Aqtóbe oblysynda taǵy 2 shekara bólimshesi salynýy múmkin
AQTÓBE. KAZINFORM — Biri Áıteke bı aýdany «Áıke», ekinshisi Mártók aýdany «Qııaly» bólimshesi. Joba kelesi aıda memlekettik saraptamaǵa jiberiledi.
Aqtóbe oblysynyń Reseımen aradaǵy shekarasynda qazir «Jaısań» jáne «Álimbet» shekara beketteri jumys istep tur. Sonyń ishinde byltyr «Álimbet» shekara beketinde jóndeý jumysy bastaldy. Qurylys 16 aıǵa josparlanǵan, bıyl bitýi tıis.
— Qaıta jańǵyrtý jumysy kezinde shekara beketin ýaqytsha jabý jospary boldy. Biraq «Jaısań» shekara beketindegi jaǵdaıǵa baılanysty aınalma jol jasaldy. Mundaǵy ótkizý pýnkti ýaqytsha kóshirildi. Qazir eki aradaǵy qozǵalysta eshqandaı shekteý joq. Al eski ǵımarat tolyq buzylyp, qurylys jumystary júrip jatyr. Bıyl jumys aıaqtalady. Qurylys basynda 36 adam jumys istep jatyr. «Álimbet» ótkizý pýnktin qaıta jańǵyrtý kezinde Qarǵaly aýdany ákimdigi 10 ga jer bóldi. Odan bólek joba kezinde turaqqa arnalǵan qosymsha jolaq salynady. Bul kezek kezinde kútýge yńǵaıly. Negizgi jolaq sany — 6, — dedi «QazAvtoJol» AQ AFO dırektory Aıbol Danaǵul.
Aqtóbe oblysynda taǵy 2 shekara bólimshesi salynýy múmkin. Qazirgi kezde «Semıpalatınsk Grajdanproekt» mekemesi jobalaý jumysyn júrgizip jatyr. Joba sáýir aıynda memlekettik saraptamaǵa jiberiledi. Jobanyń boljamdy quny — 1 mlrd teńge.
Eske salsaq, Aqtóbeniń «Jaısań» shekara beketinde jazda da, qysta da uzyn-sonar kezek túziledi. Mamandar Reseı tarapyndaǵy «Saǵyrshyn» shekara beketiniń ótkizý jolaǵy az bolǵandyqtan osyndaı problema týyndaıtynyn aıtty.