Aqtóbe oblysynda sý tasqyny ahýaly turaqtaldy, qaýip seıildi — Ashat Shaharov

AQTÓBE. KAZINFORM — Qazirgi sátte rekordtyq kórsetkishte sý qabyldaǵan sý qoımalaryndaǵy aǵys báseńdedi. Aqtóbe óńirinde sý tasqyny ahýaly turaqtaldy, qaýip seıildi dep aıtýǵa tolyq negiz bar. Aqtóbe oblysynyń ákimi Ashat Shaharovtyń beıneúndeýinde osylaı dedi.

Aqtóbe oblysynyń ákimi Ashat Shaharov óz beıneúndeýin jarııalady. Ol óńir boıynsha tek Yrǵyz aýdany ǵana táýekel aımaǵynda turǵanyn aıtty. 

— Aqtóbe óńirinde sý tasqyny ahýaly turaqtaldy, qaýip seıildi dep aıtýǵa tolyq negiz bar. Qazirgi sátte rekordtyq kórsetkishte sý qabyldaǵan sý qoımalaryndaǵy aǵys báseńdedi. Biz burynǵy qalypty ómirimizge oralyp jatyrmyz. Tek qana Yrǵyz aýdany táýekel aımaǵynda. jergilikti ákimdik pen tótenshe jaǵdaılar departamenti Torǵaı ózenindegi sý deńgeıiniń kóterilýinen Nura jáne Mamyr aýyldarynda bógetterdi nyǵaıtý úshin qosymsha tehnıkalar jumyldyrdy. Bul atalǵan eldi mekenderdi sý basýdan qorǵaý maqsatynda jasaldy, — dedi Ashat Shaharov.

Aqtóbe oblysynyń ákimi óz úndeýinde endigi jumys tasqyn saldaryn joıýǵa baǵyttalatynyn aıtty. Qazir oblysta birjolǵy tólem berilip jatyr. 

— Bizdiń aldymyzda turǵan basty mindet — sý tasqynynyń saldaryn joıý. Memleket basshysynyń tapsyrmasy boıynsha sý tasqynynan zardap shekkenderdiń barlyǵyna tıisti kómek berilýde. Birjolǵy áleýmettik tólemdi berý 6 sáýirden bastaldy. Baspanasyz qalǵan turǵyndarǵa jańa turǵyn úı salynady. Japa shekken mal, búlingen múlik, shyǵyndardy eseptep, ótemaqy tóleıtin arnaıy komıssııa jumys istep jatyr. Qabyldanǵan 3000-ǵa jýyq ótinishtiń kóp bóligi qaralyp, baǵalaý júrgizilýde. Keshegide ótken oblystyq máslıhattyń sessııasynda sý tasqynynyń saldaryn joıý úshin jergilikti bıýdjetten tıisti qarjy bekitildi. Bul qarajat óńir turǵyndaryna birjolǵy tólem jáne ótemaqy berý úshin jumsalady, — dedi Ashat Shaharov. 

Aıta keteıik, óńirde sý tasqyny kezeńi 24 naýryz kúni bastaldy. Barlyǵy 6 aýdan men Aqtóbe qalasynda tótenshe jaǵdaı engizildi.