Aqtóbe oblysynda iri qaranyń qyrylý sebebi áli anyqtalǵan joq
AQTÓBE. KAZINFORM — Yrǵyz aýdany Sheńbertal jáne Qurylys aýyldarynda 20-dan astam múıizdi iri qara óldi. Bul derek alǵash ret maýsymda tirkeldi. Ázirshe naqty sebebi anyqtalmady.
Aqtóbe oblysy Yrǵyz aýdany Qyzyljar aýyldyq okrýgine qarasty Qurylys jáne Sheńbertal aýyldarynda maýsym aıynan bastap iri qara ólimi tirkelip jatyr. Veterınar mamandar qajetti epızootııaǵa qarsy jáne dıagnostıkalyq is-sharalardy júrgizdi. Jergilikti deńgeıde eshteńe de anyqtalmady.
— Oqıǵa ornynda epızootologııalyq tekserý uıymdastyryldy, aýrý maldarǵa veterınarııalyq kómek kórsetilip jatyr. Aýrýdyń jáne mal óliminiń sebepterin anyqtaý maqsatynda patologııalyq materıaldyń synamasy alynyp, túpkilikti dıagnoz qoıý úshin oblystyq veterınarııalyq zerthanaǵa jiberildi. Sonymen qatar 9 shilde kúni patologııalyq materıal Astanadaǵy veterınarııa jónindegi ulttyq referenttik ortalyqqa joldandy. Qazirgi ýaqytta túpkilikti dıagnoz qoıylǵan joq. Zerthanalyq zertteýlerdiń nátıjesin kútemiz. Zertteý qorytyndylary alynǵannan keıin qosymsha aqparat beriledi, — dep habarlady Aqtóbe oblystyq veterınarııa basqarmasy.
Alǵashqy zertteýde qandaı da juqpaly aýrý tirkelmegen. Boljam boıynsha iri qara ólimine kene sebep bolýy múmkin. Sebebi qazir dalada kene kóp jáne iri qarany shyqqan.
Al áleýmettik jelidegi vıdeodan mal isinip, ólgen soń adamdardyń ony órtegen sátin kórýge bolady.
Buǵan deıin Batys Qazaqstan oblysyndaǵy aýylda elektr symynyń úzilýi saldarynan mal ólimi tirkelgenin habarlaǵan edik.
