Aqtóbe oblysynda polıtsııa erekshe qorǵalatyn aýmaqta zańsyz balyq aýlaýdyń jolyn kesti
ASTANA. KAZINFORM — Polıtsııa qyzmetkerleri zańsyz balyq aýlap júrgen alty jergilikti turǵyndy ustady.
Aqtóbe oblysy polıtsııa departamentiniń uıymdasqan qylmysqa qarsy kúres basqarmasynyń qyzmetkerleri jedel-izdestirý is-sharalary barysynda erekshe qorǵalatyn tabıǵı aýmaqta zańsyz balyq aýlaý deregin anyqtady.
Zańsyz áreket Yrǵyz aýylynan 75 shaqyrym qashyqtyqta ornalasqan, erekshe qorǵalatyn tabıǵı aýmaqqa kiretin Aıkól kólinde tirkeldi. Polıtsııa qyzmetkerleri zańsyz balyq aýlap júrgen alty jergilikti turǵyndy ustady.
Oqıǵa ornyn qaraý barysynda ÝAZ, VAZ-2107 jáne ÝAZ Patrıot avtokólikteri, uzyndyǵy 100 metrden asatyn eki balyq aýlaý tory, eki úrlemeli rezeńke qaıyq, sondaı-aq sazan men shortan tuqymdas balyqtar salynǵan 17 qap tárkilendi.
Tárkilengen avtokólikter aýdandyq polıtsııa bóliminiń arnaıy aıyp turaǵyna qoıyldy.
Atalǵan derek boıynsha Qazaqstan Respýblıkasy Qylmystyq kodeksiniń 335-baby (Balyq resýrstaryn, basqa da sý janýarlaryn nemese ósimdikterin zańsyz óndirý) boıynsha sotqa deıingi tergep-tekserý bastaldy.
Qazirgi ýaqytta oqıǵanyń barlyq mán-jaıy anyqtalyp jatyr. Qorshaǵan ortaǵa keltirilgen zalal kólemi ýákiletti organnyń tıisti qorytyndysynan keıin belgili bolady.
Aıta ketelik ShQO-da Qyzyl kitapqa engen balyqtardy zańsyz aýlaǵan top ustalǵan edi.
