Aqtóbe oblysynda óńirdi damytý baǵytynda iske asyrylýy tıis mańyzdy máseleler talqylandy
AQTÓBE. KAZINFORM - Oblys ákimi Ashat Shaharovtyń tóraǵalyǵymen ótken otyrysta Memleket basshysy Qasym-Jomart Toqaevtyń 8 qyrkúıekte jarııalaǵan «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn óńirde iske asyrý joldary qaraldy.
Jıynǵa máslıhat depýtattary, qoǵamdyq keńes músheleri, oblystyq basqarmalar men departamentterdiń basshylary, sondaı-aq bıznes ókilderi qatysty, aýdan ákimderi beınekonferents baılanysy arqyly qosyldy.
Óńir basshysy óz sózinde Prezıdent Joldaýy memlekettiń damýyna jańa kózqaras pen tyń serpin beretin strategııalyq baǵdar ekenin alǵa tartty. Birqatar mańyzdy mindetterdi aıqyndap, barlyq quzyrly organ men mekemeler, jeke sektor birlese jumys isteýi qajet.
Memleket basshysy Joldaýda ınvestıtsııa tartý, agroónerkásiptik keshendi damytý, kólik-logıstıka salasyn jetildirý máselelerine basa nazar aýdardy.
Sondaı-aq, Prezıdent zamanaýı tehnologııalardyń rólin, jasandy ıntellekt pen tsıfrlyq sheshimderdiń el ekonomıkasy men qoǵam ómirindegi mańyzyn erekshe atap ótti.
Áleýmettik ádilettilik, adamı kapıtaldy damytý, bilim berý, densaýlyq saqtaý, ekologııa, óńirlik damý, tsıfrlyq teńsizdikti joıý sııaqty ózekti máseleler boıynsha da naqty tapsyrmalar berildi.
- Basty maqsatymyz – Joldaýda júktelgen mindetterdi tıimdi, sapaly ári ýaqytyly oryndaý. Bul – jalpyulttyq maqsat. Ýaqyt óte tyǵyz, toqmeıilsip otyrýǵa bolmaıdy. Buǵan aldymen óńir basshysy retinde meniń jaýap beretinimdi eskergen jón», – dep atap ótti oblys ákimi Ashat Shaharov.
Otyrysta oblys ákiminiń orynbasarlary óz salalaryn qamtı otyryp, baıandama jasady, Joldaý aıasynda iske asyrylatyn sharalar josparyn tanystyrdy. Ashat Shaharov ár baǵyt boıynsha naqty tapsyrmalar júktedi.
Jıyn qorytyndysy boıynsha barlyq quzyrly organdar men mekemelerge, sondaı-aq jeke sektorǵa birlese otyryp jumys isteý tapsyryldy.