Aqtóbe oblysynda nege náreste ólimi kóp — ákim jaýaby

ASTANA. KAZINFORM — Aqtóbe oblysynyń ákimi Ashat Shaharov Jibek Joly arnasyndaǵy «Ýáde» baǵdarlamasynda óńirde nege náreste ólimi kóbeıip ketkenin aıtty. 

— Ár tirkelgen sábı ólimine baılanysty sheshim qabyldanady. Sondyqtan onyń júıelik sebebi mynaý dep sizge aıta almaımyn. Byltyr, qatelespesem, 8 náresteniń ólimi tirkeldi. Bıyl bolashaq analarmen túsindirý jumysyn jandandyrdyq. Buryn bosanýǵa 2-3 kún qalǵanda ǵana aýrýhanaǵa jatqyzylatyn. Qazir júktilik merziminde qandaı da bir aýytqýlar bolsa, táýekel týyndasa, bir aı buryn jatqyzatyn boldyq. Segiz kereýettik mekemege bet burdyq, — dedi ol.

Ákimniń aıtýynsha, óńirde medıtsına salasyn tsıfrlandyrýǵa erekshe kóńil bólinip otyr.

— Medıtsınany tsıfrlandyrý, jasandy ıntellekt arqyly, telemedıtsına arqyly keńes beretin ortalyq ashyldy. JI kómegimen aýrýdyń aldyn ala anyqtaý kórsetkishi 34 paıyz ósti, — dedi oblys basshysy.

Úkimettiń resmı málimetine sensek, 2025 jyldyń birinshi jartysynda náreste ólimi 22,7 paıyz tómendegen.