Aqtóbe oblysynda mektepterdiń ashanasyna monıtorıng júrgizilip jatyr

AQTÓBE. KAZINFORM – Aqtóbe oblysynda memlekettik mektepterderdiń ashanasyn arnaıy monıtorıng toby tekserip júr. Ázirge buzýshylyq anyqtalmady. 

Aqtóbe oblysyndaǵy 399 mektepte ystyq tamaqpen qamtamasyz etý uıymdastyrylyp otyr. Onyń ishinde 377 mektepte ashana bar. Al 22 mekteptiń balalary býfetten tamaqtanady.

– Bastaýysh synypta oqıtyn 70 161 bala ystyq tamaqpen qamtylǵan. 5-11 synyptardaǵy arnaıy top balalaryna da ystyq tamaq beriledi. Bul baǵytta 8 mlrd teńgege jýyq qarjy bólindi. Barlyǵy 80 myńnan astam bala tamaqtanyp otyr. Bıyl ár balaǵa 603 tg kóleminde qarjy qarastyryldy. Oblystyq bilim basqarmasynda eki aptalyq biryńǵaı as máziri bekitildi. Osyǵan sáıkes árbir bilim berý uıymy kúndelikti mázirdi bekitedi. Oblystaǵy bilim berý uıymdarynda 87 ónim berýshi qyzmet kórsetedi. Negizgi bóligi birneshe jyldan beri jumys istep júr, - dedi Aqtóbe oblystyq bilim basqarmasy basshysynyń orynbasary Dına Jamanbaeva. 

Onyń aıtýynsha, bıyl jyl basynan beri oblystyq bilim basqarmasy 227, al qalalyq jáne aýdandyq bilim bólimderi 296 mektepke monıtorıng jasady. Qazir de sapartamalyq top jumys istep júr. 

– Monıtorıng topta qoǵamdyq keńes, qamqorshylyq keńes ókilderi men ata-ana komıtetiniń músheleri, kásipkerler bar. Monıtorıng qalamen qatar aýdandarda júrgizilip jatyr. Bıyl 64 mektepiń jıhazy men as bloktary jańartyldy, - dedi Dına Jamanbaeva.

Óńirlik kommýnıkatsııalar qyzmetinde ótken baspasóz konferentsııasynda Aqtóbe oblystyq sanıtarııalyq-epıdemıologııalyq baqylaý departamentiniń basshysy Raıhan Qoıshanova, monıtorıng kezinde qandaı da bir sáıkessizdik anyqtalmaǵanyn jetkizdi. Degenmen 8 aıda óńirde jedel ishek ınfektsııasynyń 916 jaǵdaıy tirkeldi. Onyń 97%-y 14 jasqa deıingi balalar arasynda anyqtaldy. Kóbi jeke bas gıgıenasyn saqtamaǵan, sút qospalary durys daıyndalmaǵan.

Eske salsaq, Mańǵystaýda mektep oqýshylary jappaı ýlanyp, aýrýhanada em qabyldady. Tekserý kezinde ydys jýýshy dızenterııa tasymaldaýshy bolyp shyqty.