Aqtóbe oblysynda medıtsınalyq qyzmetter anyqtamasy qymbat baǵaǵa satylyp kelgen

ASTANA. KAZINFORM – «Zań jáne Tártip» ıdeologııasyn iske asyrý aıasynda Aqtóbe oblysy prokýratýrasy azamattardyń densaýlyq saqtaý salasyndaǵy quqyqtarynyń saqtalýyna taldaý júrgizdi.

Oıyl aýdanynda aqyly medıtsınalyq qyzmetterdiń quny negizsiz qymbattatylǵany anyqtaldy. №073/e (kólik quralyn basqarýǵa ruqsat alý úshin) jáne №075/e anyqtamalary (medıtsınalyq kásibı-konsýltatsııalyq qorytyndy) 7 705 teńge, al №076/e anyqtamasy (qarý ustaýǵa ruqsat alý úshin) 9 405 teńge bolǵan.

- Qyzmet baǵasyna hırýrg, nevropatolog qaraýy jáne Vasserman reaktsııasyna qan taldaýy sııaqty qosymsha medıtsınalyq qyzmetterdiń negizsiz engizilgeni belgili boldy. Sonymen qatar, aýrýhananyń qajetti dıagnostıkalyq jabdyqpen tolyq qamtylmaýynan naýqastar oblystyq medıtsınalyq mekemelerge júginýge májbúr, - delingen prokýratýranyń aqparatynda.

Prokýrorlyq qadaǵalaý aktisi negizinde anyqtamalar quny №073/e – 6 000 teńgege, №075/e – 5 000 teńgege, №076/e – 9 000 teńgege tómendetildi.

Nátıjesinde azamattardyń quqyqtary qalpyna keltirilip, jaýapty laýazymdy tulǵalar tártiptik jaýapkershilikke tartyldy. Sondaı-aq, jetispeıtin jabdyqtardy satyp alý máselesi boıynsha oblystyq densaýlyq saqtaý basqarmasyna ótinim joldanǵan.

Aıta keteıik, medıtsına salasyndaǵy jemqorlyqtyń jartysynan kóbi byltyr Shymkentte tirkelgen.