Aqtóbe oblysynda mal urlyǵyna kúdiktiler qylmys ústinde ustaldy

ASTANA. KAZINFORM – Aqtóbe oblysynda polıtseıler mal urlyǵyna kúdiktilerdi qylmys ústinde ustady, dep habarlaıdy Polisia.kz.

Oblystyq polıtsııa departamentiniń uıymdasqan qylmysqa qarsy kúres basqarmasy júrgizgen jedel-izdestirý is-sharalary barysynda eki azamat qolǵa tústi.

Martók aýdany aýmaǵyndaǵy orman alqabynda kúdiktiler zattaı dáleldermen ustaldy.

Olardyń biri urlanǵan jylqynyń etin sol jerde bólip jatqan sátinde qolǵa túsken. Tergeý málimetine saı, kúdiktilerdiń biri jaıylymdaǵy jylqyny ormanǵa aıdap ákelip soıǵan.

Al ekinshisi deldal retinde etti qala bazarynda satýdy josparlaǵan.

Oqıǵa ornynan polıtsııa qyzmetkerleri jylqynyń soıylǵan etin, sondaı-aq kúdiktiler paıdalanǵan kólik quraldaryn – mototsıkl men jol talǵamaıtyn avtokólikti tárkiledi.

Atalǵan fakti boıynsha sotqa deıingi tergeý amaldary júrgizilip jatyr. Qazirgi ýaqytta kúdiktilerdiń basqa da uqsas qylmystarǵa qatystylyǵy tekserilýde.

Polıtsııa mal ıelerine tórt túlikti qaraýsyz qaldyrmaýdy jáne saqtyq sharalaryn qatań saqtaýdy eskertedi. Sondaı-aq kúdikti áreketter baıqalǵan jaǵdaıda dereý quqyq qorǵaý organdaryna habarlasýǵa shaqyrady.

Aıta keteıik, jaqynda Pavlodar oblysynda mal urlyǵymen aınalysqan úsh qylmystyq top quryqtaldy.