Aqtóbe oblysynda qurǵaq shóp órtenip, keıbir aýyldarǵa qaýip tóndi
AQTÓBE. KAZINFORM – Baıǵanın aýdanynyń Dııar aýylynan 70 shaqyrym qashyqtyqta qurǵaq shóp órtendi. Órt sóndirý jumysy 2 maýsym kúni túnde bastalyp, búgin aıaqtaldy.
Aqtóbe oblystyq TJD baspasóz qyzmetiniń habarlaýynsha, órt Mııaly aýyldyq okrýgi Dııar aýylynan 70 shaqyrym qashyqtyqta tutanǵan. Otqa oranǵan qurǵaq shópti sóndirýge órt sóndirýshiler jáne jergilikti atqarýshy organ qyzmetkerleri barǵan. Saılanǵanyna eki-aq kún bolǵan Mııaly aýyldyq okrýginiń ákimi Isataı Mánibaevtiń aıtýynsha, órt 2 maýsym kúni túnde tirkelgen.
- Edireı jerinen janyp kelgen órt 2 maýsym kúni túnde bastaldy. Qalaı órtengenin eshkim de bilmeıdi. Dııar aýylyna jaqyndaǵan jerden turǵyndar, qojalyq jumysshylary, órtke qarsy beket qyzmetkerleri shyǵyp, sóndirdi. Aýylǵa jetkizbedi. Qalǵan órt jel aýǵan kezde Jańajol aýyldyq okrýgine aýysyp ketti. Sondyqtan biz, Jańajol aýyldyq okrýgi ákimdiginiń qyzmetkerleri kesheden beri sonda júrip, jańa kelip jatyrmyz. Áli de ár jerinde janyp jatqan jerler bar. Ol jerlerdi adamdar baqylap, sóndirip júr. Malǵa, janǵa qaýip joq. Órt aýyldan 70 shaqyrym qashyqtyqta tirkeldi,- dedi Mııaly aýyldyq okrýginiń ákimi Isataı Mánibaev.
Onyń aıtýynsha, bıyl shóp qalyń shyqqanymen qýraǵan.
- Dııar aýylynan úsh traktor, 1 Ýral kóligi bardy. Sonymen birge Oımaýyttan jer jyrtatyn mashına jáne birneshe ÝAZ kóligi bardy. Bárimiz jabylyp sóndirip jatyrmyz. Adamdar artyn qarap tur. Tutanyp ketýi múmkin,- dedi Isataı Mánibaev.
