Aqtóbe oblysynda kólikteri buzylyp, jolda qalǵan tórt Tájikstan azamaty qutqaryldy

ASTANA. KAZINFORM – Búgin túnde taǵy birqatar júrgizýshi kóligimen jolda turyp qalyp, qutqarýshylardyń kómegine zárý boldy, dep habarlaıdy QR Tótenshe jaǵdaılar mınıstrliginiń baspasóz qyzmeti.

Baspasóz qyzmetiniń málimetterine qaraǵanda, Tótenshe jaǵdaılar mınıstrliginiń qutqarýshylary Aqtóbe oblysyndaǵy jylytý pýnktine jáne jaqyn mańdaǵy eldi mekenderge 21 adamdy, onyń ishinde 5 balany evakýatsııalady. Sondaı-aq, qarda turyp qalǵan avtokólikten 4 adamdy qutqardy.

Avarııalyq-qutqarý jumystary respýblıkalyq mańyzy bar «Samara-Shymkent» jáne «Aqtóbe-Atyraý-Astrahan» avtojoldarynda júrgizildi.

Sondaı-aq búgin túnde tótenshe jaǵdaı qyzmetkerlerine Aqtóbe oblysy Alǵa qalasynda 1958 jyly týǵan er adamǵa ota jasatý úshin ony medıtsınalyq mekemege jetkizý qajet ekendigi týraly habarlama kelip túsken. Jol jabyq bolǵandyqtan, jedel járdem qyzmetkerlerimen birge jol talǵamaıtyn Trekol kóligimen jolǵa shyǵý qajet boldy. Qutqarýshylar adamdy shuǵyl túrde Aqtóbe qalasyna jetkizip, odan ári oblystyq aýrýhanaǵa jatqyzý úshin jedel medıtsınalyq kómek brıgadasyna tapsyrdy.

Al Aqtóbe oblysynyń Hromtaý aýdanynda Samara-Shymkent avtojolynda patrýldeý kezinde 4 Tájikstan azamattary mingen avtokólik TJM 20982 áskerı bóliminiń kúshimen Hromtaý qalasyndaǵy Sherhan kempıngine súırep, jetkizildi. Belgili bolǵandaı olardyń kólikteri synyp, qozǵalysty jalǵastyra almaǵan. Shetel azamattary alǵystaryn bildirdi.

Osyǵan deıin Hromtaý jáne Oıyl aýdanynda segiz adam mingen eki jeńil kólik qar qursaýynda qalǵany týraly jazdyq.