Aqtóbede úılený toıynyń korteji úshin júrgizýshiler jazalandy
ASTANA. KAZINFORM — Aqtóbe oblysynda úılený toıyna arnalǵan avtokólikter kortejinde jol qozǵalysy erejelerin óreskel buzǵan júrgizýshiler jaýapkershilikke tartyldy. Quqyq buzýshylyqtar áleýmettik jelidegi beınejazbadan anyqtalǵan.
Polıtsııa qyzmetkerleri áleýmettik jelilerge júrgizilgen monıtorıng barysynda úılený toıynyń korteji túsirilgen beınematerıalǵa nazar aýdarǵan. Kadrlarda jolaýshylardyń kólik terezelerinen denelerin shyǵarǵany, keı júrgizýshilerdiń rólde kele jatyp uıaly telefon paıdalanǵany jáne qaýipsizdik beldigin taqpaǵany kórinedi.
Polıtsııanyń málimetinshe, mundaı áreketter jol qozǵalysynyń basqa qatysýshylarynyń ómiri men densaýlyǵyna qaýip tóndiredi.
Beınejazbany zerdelegen Muǵaljar aýdandyq polıtsııa bóliminiń qyzmetkerleri kortejge qatysqan barlyq kólik júrgizýshileri men jolaýshylardy anyqtady. Quqyq buzýshylyq jasaǵan azamattardyń barlyǵy qoldanystaǵy zańnamaǵa sáıkes ákimshilik jaýapkershilikke tartyldy. Sonymen qatar kólikterdiń biri arnaıy turaqqa qoıyldy.
Polıtsııa júrgizýshilerdi jol qozǵalysy erejelerin qatań saqtaýǵa, kólik basqarý kezinde uıaly telefon qoldanbaýǵa jáne qaýipsizdik beldigin taǵýǵa úndedi.
Vedomstvo jolaýshylar da qaýipsizdik talaptaryn saqtap, óz áreketterimen joldaǵy basqa azamattarǵa qaýip tóndirmeýi kerek ekenin eskertti.
Eske salaıyq, buǵan deıin Jezqazǵanda jol erejesin buzyp, toı kortejin uıymdastyrǵandar jaýapqa tartylǵanyn habarlaǵanbyz.
