Aqtóbe oblysynda Qarabutaq – Qostanaı jolynyń 80 shaqyrymy jóndeledi
ASTANA. KAZINFORM – Aqtóbe oblysyndaǵy respýblıkalyq mańyzy bar Qarabutaq – Qostanaı avtojolynyń 80 shaqyrym ýchaskesinde ortasha jóndeý jumystary júrgizilip jatyr.
Jóndeý jumystary jalpy uzyndyǵy 234 shaqyrym bolatyn joldyń 105-136 jáne 185-234 shaqyrym aralyqtaryn qamtıdy.
Qurylys alańynda asfalt-beton zaýyty men qıyrshyq tas óndirýge arnalǵan usaqtaý-suryptaý kesheni iske qosylǵan.
Joba aıasynda eski jol jamylǵysy jonylyp, sýyq joný ádisi arqyly joldyń negizi nyǵaıtylady. Bul tehnologııa joldyń beriktigin arttyryp, onyń paıdalaný merzimin uzartýǵa múmkindik beredi.
«QazAvtoJol» ulttyq kompanııasy Aqtóbe oblystyq fılıalynyń dırektory Aıbol Danaǵuldyń aıtýynsha, jóndeý barysynda jolǵa qalyńdyǵy 9 jáne 6 santımetr bolatyn eki qabat asfalt-beton tóseledi.
«Sonymen qatar jol jıekteri nyǵaıtylyp, jańa jol belgileri ornatylady», – dedi Aıbol Danaǵul.
Qazirgi ýaqytta jumystar bekitilgen kestege sáıkes júrgizilip jatyr.
Mamandardyń aıtýynsha, joba aıaqtalǵannan keıin jol sapasy aıtarlyqtaı jaqsaryp, respýblıkalyq mańyzy bar kólik dáliziniń ótkizý qabileti artady.
Aıta keteıik, «QazAvtoJol» júrgizýshilerge úndeý jasady.
