Aqtóbe oblysynda qala ákimi para aldy degen kúdikpen ustaldy

AQTÓBE. KAZINFORM – Hromtaý qalasynyń ákimi Saǵyndyq Shabyqbaev para aldy degen kúdikpen ustaldy. Endi ol tergeý aıaqtalǵansha qamaýda otyrady.

- Sot 2 aıǵa sanktsııa berdi. Ózge aqparat berilmeıdi,- dep habarlady Aqtóbe oblystyq sotynyń baspasóz qyzmeti.

Hromtaý aýdany ákimdiginiń resmı paraqshasyndaǵy aqparatqa súıensek, 40 jastaǵy Saǵyndyq Shabyqbaev osydan eki jyl buryn qala ákimi qyzmetine kiristi. Oǵan deıin ákimniń orynbasary bolǵan. Eńbek jolyn 2008 jyly Áıteke bı aýdanyndaǵy halyqqa qyzmet kórsetý ortalyǵynan bastady. 2016 jyly ákimshilikte qyzmet etti. 2017 jyldan bastap Hromtaý aýdany ákiminiń apparatynda jumys istep, 2018-2023 jyldary aralyǵynda qala ákiminiń orynbasary boldy.

Eske salsaq, buǵan deıin Shalqar aýdandyq sáýlet, qurylys jáne qala qurylysy bóliminiń basshysy Shuǵa Sádýaqasova para alǵany úshin 7 jylǵa bas bostandyǵynan aıyryldy. Sýdıa Aqtóbe oblysy ákimine jeke qaýly shyǵardy.