Aqtóbe oblysynda ınvestorlarǵa qyzmet kórsetý ortalyǵy ashylýy múmkin
ASTANA. KAZINFORM — Oblys prokýratýrasynda «Atameken» Kásipkerlik palatasy ókilderiniń qatysýymen «Bıznesti qorǵaý jáne ınvestıtsııalyq jobalardy súıemeldeý» taqyrybynda májilis ótti, dep habarlaıdy vedomstvonyń baspasóz qyzmeti.
Májiliste oblys prokýrory Marat Ábishev, oblys prokýrory, oblys ákimi jáne óńirlik «Atameken» kásipkerler palatasymen birlesip, 2026–2027 jyldar aralyǵynda óńirde kásipkerlik ahýaldy jaqsartýǵa baǵyttalǵan birlesken jospardy iske asyrýdyń mańyzdylyǵyn atap kórsetti.
— Josparda bıylǵy jyldyń birinshi toqsanynda «bir tereze» qaǵıdaty boıynsha Arnaıy ekonomıkalyq aımaqta «prokýrorlyq súzgini» odan ári damytý maqsatynda ınvestorlarǵa qyzmet kórsetý ortalyǵyn ashý kózdelgen. Ortalyq ınvestıtsııalar men ınvestıtsııalyq qyzmet salasyndaǵy joǵary qadaǵalaýdy júzege asyrýǵa baǵyttalady. Budan bólek, óńirdiń bıznes sýbektileri men baqylaý — qadaǵalaý organdarynyń qatysýymen «Kásipkerlikti qorǵaý forýmy» ótkizý josparlanyp otyr, — delingen habarlamada.
Oblys prokýrory ınvestorlardyń quqyqtaryn qorǵaý jáne ınvestıtsııalyq jobalardy súıemeldeý — Memleket basshysynyń jáne Bas prokýrordyń tapsyrmasymen aıqyndalǵan basym baǵyttardyń biri ekenin erekshe atap kórsetti. Bul mindetterdiń oryndalýy prokýrorlardan joǵary jaýapkershilikti talap etedi.
Jalpyulttyq jobalar pýlyna ınvestıtsııa kólemi 3,3 trln teńgeni quraıtyn 54 ınvestıtsııalyq joba engizildi, onyń aıasynda 7 myńnan astam jańa jumys ornyn qurý josparlanǵan. Qadaǵalaý jumystaryn jandandyrý maqsatynda, oblys prokýrorynyń ókimimen, mańyzdy ınvestıtsııalyq jobalardy súıemeldeý sapasyn arttyrýda ár jobaǵa jaýapty qyzmetker bekitildi.
Sóz sońynda oblys prokýrory «Atameken» Kásipkerlik palatasy basshysyna jáne qala, aýdan prokýrorlaryna birlesken Jospar tarmaqtaryn sapaly oryndaýdy tapsyrdy.
Osydan buryn Alataý qalasynda 1,8 trln teńgelik 44 ınvestıtsııalyq joba iske asyrylatynyn jazǵanbyz.