Aqtóbe oblysynda ınternet-esirtki dúkenin uıymdastyrýshy 17 jylǵa sottaldy
AQTÓBE.KAZINFORM - Aqtóbe oblysynyń prokýratýrasy Polıtsııa departamenti jáne Ekonomıkalyq tergep-tekserý departamentimen birlesip, ınternet alańdary arqyly esirtki zattaryn satýmen aınalysqan iri qylmystyq jeliniń qyzmetin toqtatty.
Aqtóbe oblystyq prokýratýrasy baspasóz qyzmetiniń habarlaýynsha, qylmystyq shema «Telegram» messendjeri arqyly júzege asyrylǵan jáne «qashyqtan satý» qaǵıdaty boıynsha jumys istegen.
Tapsyrystar qashyqtan qabyldanyp, tólemder «dropperler» dep atalatyn tulǵalardyń banktik kartalary arqyly júrgizilgen, bul qylmyskerlerge uzaq ýaqyt boıy ózderiniń zańsyz áreketterin jasyryp kelýge múmkindik bergen.
Jedel-tergeý is-sharalary men aqsha qarajatynyń qozǵalysyn taldaý nátıjesinde qylmystyq top qatysýshylary Qaraǵandy, Soltústik Qazaqstan, Aqmola jáne Aqtóbe oblystarynyń aýmaǵynda, sondaı-aq Astana qalasynda ustaldy.
Uıymdasqan qylmystyq top quramynda bolǵan 6 adam ustaldy.
Zańsyz aınalymnan 10 kg astam psıhotroptyq zattar tárkilendi.
Osy derek boıynsha ótken jyldyń qyrkúıek aıynda Aqtóbe oblysynyń arnaıy prokýrorlary «Qymyz shop» ınternet-dúkeni arqyly elimizdiń aýmaǵynda psıhotroptyq zattardy ótkizýmen aınalysqan uıymdasqan qylmystyq topqa qatysty qylmystyq isti tergep-tekserýdi aıaqtady.
Quqyq qorǵaý organdarynyń úılesimdi jumysynyń nátıjesinde ınternet-esirtki dúkeniniń qyzmeti tolyq áshkerelenip, joıyldy.
Tergeý qorytyndysy boıynsha qylmystyq is sotqa joldandy.
2026 jylǵy 16 naýryzda Aqtóbe oblysynyń qylmystyq ister jónindegi mamandandyrylǵan aýdanaralyq sotynyń úkimimen uıymdasqan qylmystyq toptyń 6 qatysýshysy kináli dep tanylyp, 15 jyldan 17 jylǵa deıingi merzimge bas bostandyǵynan aıyryldy.
Aıta ketý kerek, bıylǵy jyl basynan beri oblys prokýratýrasy ýákiletti organdarmen jáne jurtshylyqpen birlesip, esirtki qylmysyna qarsy is-qımyl jáne esirtkiniń taralýynyń aldyn alý baǵytynda júıeli jumys júrgizip keledi.
Máselen, eriktiler men kolledj stýdentteriniń qatysýymen ınternet-esirtki dúkenderin jarnamalaıtyn 20-dan astam graffıtı jazbalary anyqtalyp, joıyldy.
Osy faktiler boıynsha 2 sotqa deıingi tergep-tekserý bastaldy.
500-den astam profılaktıkalyq is-shara ótkizildi, onyń ishinde oqý oryndarynda 300 dáris, 80 kezdesý jáne jastar arasynda esirtkige qarsy kózqarasty qalyptastyrýǵa baǵyttalǵan 4 konkýrs uıymdastyryldy, jalpy qamtý shamamen 13 myńnan astam adamdy qurady.
Joǵary synyp oqýshylary úshin «Zakladka», «Zakladchıkı. Rasplata» jáne«Illıýzııa svobody» atty profılaktıkalyq fılmderdiń kórsetilimi uıymdastyrylyp, olardy shamamen 16 myń oqýshy tamashalady.
Sonymen qatar, tergeý barysynda 5 qylmystyq is aıasynda jalpy somasy 65,5 mln teńgeni quraıtyn 2 myń banktik shot pen 34 myń sheteldik karta buǵattaldy.
Sondaı-aq «Kıbernadzor» júıesi arqyly esirtki quraldaryn jarnamalaý jáne satýmen aınalysqan 260 Telegram-arnasy men ınternet-resýrsyna qoljetimdilik shekteldi.
Bul baǵyttaǵy jumys jalǵasyp jatyr.
Osyǵan deıin Qazaqstanda byltyr 12 tonnadan astam esirtki tárkilengeni týraly jazdyq.