Aqtóbe oblysynda ınternet-alaıaqtyq derekteri 12%-ǵa azaıdy
ASTANA. KAZINFORM — Aqtóbe oblysynda ınternet-alaıaqtyqqa jáne esirtki qylmysyna qarsy is-qımyl sharalary kúsheıtildi, dep habarlaıdy oblystyq prokýratýranyń baspasóz qyzmeti.
Aqtóbe oblysynyń prokýratýrasy oblystyq PD Kıberqylmysqa qarsy is-qımyl basqarmasymen birlesip, ınternet-alaıaqtyqtyń jáne esirtki qylmysynyń aldyn alýǵa baǵyttalǵan «Aqtóbe — alaıaqtyqsyz aýmaq» jáne «Esirtki tosqaýyly-2026» jobalaryn iske asyrýdy jalǵastyryp jatyr.
Quqyq qorǵaý organdarynyń, ekinshi deńgeıdegi bankterdiń, jergilikti atqarýshy organdar men jurtshylyqtyń ózara tyǵyz is-qımylynyń arqasynda óńirde qylmys deńgeıiniń tómendeýi baıqalady.
— Alaıaqtyq faktileriniń sany 6%-ǵa, al ınternet-alaıaqtyq 12%-ǵa azaıdy. Aqshalaı qarajatty qolma-qol aqshaǵa aınaldyrýmen aınalysqan, aınalymy 3,3 mlrd teńgeni quraǵan uıymdasqan qylmystyq toptyń qyzmetine tosqaýyl qoıyldy. Sondaı-aq 150 dropper anyqtalyp, 6 uıymdastyrýshy qamaýǵa alyndy, eki adamǵa halyqaralyq izdeý jarııalandy, — delingen vedomstvo habarlamasynda.
«Esirtki tosqaýyly-2026» jobasy aıasynda aldyn alýdyń tsıfrlyq quraldary engizildi. «Avtobys» mobıldi qosymshasy arqyly esirtki qylmysynyń aldyn alý boıynsha aqparattyq materıaldar ornalastyrylyp, 300 myńǵa jýyq paıdalanýshy qamtyldy.
Budan bólek, qoǵamdyq kólikterde taqyryptyq aýdıorolıkterdiń turaqty túrde habarlanýy uıymdastyryldy. Qabyldanǵan sharalardyń nátıjesinde tirkelgen esirtki qylmystarynyń sany 10%-ǵa, onyń ishinde ótkizý faktileri 24,5%-ǵa, esirtki quraldaryn saqtaý faktileri 19,7%-ǵa tómendedi.
