Aqtóbe oblysynda endi júk pen adamdardy ponton kópir arqyly tasymaldaıdy
AQTÓBE. KAZINFORM - Aqtóbe oblysy Oıyl aýdanynyń ortalyǵynda endi júk pen adamdardy ponton kópir arqyly tasymaldaıdy. Buǵan deıin tek áskerı oqý-jattyǵýda paıdalanǵan jyljymaly kópir birneshe aı Oıyl halqyn oblys ortalyǵy, aýyldarmen baılanystyrady.
Aqtóbe oblysy Oıyl aýdanyna ponton kópirdi Qorǵanys mınıstrligi berdi. Elimizdiń Tótenshe jaǵdaılar mınıstrligi 16 myń halqy bar aýdannyń qatynasy kúrt úzilgende usynys aıtyp, 50 saǵatta tehnıka men áskerıler Aqtóbege jetti.
«Oıylda 16 myń adam turady. Al mundaǵy kópirdi sý shaıdy. Halyqtyń qatynasy qıyndyq týdyrdy. TJM Qorǵanys mınıstrdigine ponton kópir bar ekenin aıtyp, kómek surady. Olar qoldap, Aqtóbege jiberdi. Júk 50 saǵatta jetti. «Qazaqstan temir joly» UK 10 platforma, bir vagon berdi. Jol jóndelgenshe, kópir qalpyna kelgenshe ponton kópir osynda bolady. Mundaı sheshim elimizde birinshi ret qabyldanǵan. Qorǵanys mınıstrligine raqmet aıtqym keledi. Ponton kópir birneshe jeńil kólikti tasymaldaı alady. Saǵat saıyn júredi. Birinde taq, birinde jup», - dedi QR TJ vıtse-mınıstri Serik Tólenbergenov.
Ponton kópir elimiz boıynsha 58012 áskerı bóliminde ǵana bar. Buǵan deıin tek áskerı oqý-jattyǵýda qoldanyldy.
«3 sáýir kúni pontondyq kópir batalonynyń jeke quramy jedel jumyldyryldy. Sý tasqynynan zardap shekken Oıyl aýdanyna keldik. Qazir Oıyl ózeninde 60 tonnalyq pontondyq kópir bar. Gýmanıtarlyq kómek, jeke quramdy tasymaldaýǵa kerek. Biz 2 kúnde keldik. 15 qyzmetker, 8 áskerı tehnıka bar. Ár jyldary ártúrli oqý-jattyǵýda paıdalandyq. Pontondyq kópir Qazaqstan boıynsha 58012 áskerı bóliminde ǵana bar. Bul joly halyqqa kómek kórsetý úshin Aqtóbe oblysyna ákelip turmyz», - dedi 58012 áskerı bólim komandıriniń tehnıkalyq jóninde orynbasary Tuıaqbaev.
Aqtóbe oblysy Oıyl aýdanynyń ortalyǵy qazir sý qorshaýynda tur. Oblys ortalyǵyna qatynaıtyn joldy sý shaıǵan, kópir apatty kúıge túsken.
«Biz osy jyljymaly kópirdi jol salyp bolǵansha paıdalanamyz. Osylaısha qatynasty qamtamasyz ete alamyz. Sebebi aýdanǵa kireberis joldyń 350 metrin shaıyp ketken. Endigi mindet – sol joldy jóndeý. Sonymen birge kireberiste 300 metr kópir bar. Kópir de apatty jaǵdaıda tur. Ony qaraýǵa jobalyq ınstıtýt qyzmetkerleri keldi. Tehnıkalyq qorytyndy alǵan soń qujattama jasalady. Sý tasqyny kezinde 300 metr kópirdiń eki tireýi syr bergen. Búginde bir bóligi paıdaǵa aspaı qaldy. Tehnıkalyq jaǵdaıy týraly qorytyndy alǵan soń kópirdi túgel qaıta salatynymyz nemese jalǵaıtynymyz belgili bolady», - dedi Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıbek Qaıyr.
Eske salsaq, Oıylda bıyl 24 naýryzja jergilikti deńgeıde tótenshe jaǵdaı jarııalandy.
