Aqtóbe oblysynda eki «jaıly mektepte» oqý bastaldy
AQTÓBE. KAZINFORM — Ekeýi de oblys ortalyǵynda. Biri — Aqjar-2 eldi mekeninde, ekinshisi — Eset batyr turǵyn alabynda ornalasqan, dep habarlaıdy Aqtóbe oblysynyń ákimdigi.
Óńir basshysy Ashat Shaharov jańa «jaıly mektepterdiń» jaı-kúıimen tanysyp, muǵalimdermen jáne oqýshylardyń ata-analarmen kezdesip, balalardyń zamanaýı bilim alý múmkindikterin baǵamdady.
Aqjardaǵy jańa № 79 jalpy bilim beretin orta mektep — Memleket basshysy Qasym-Jomart Toqaevtyń elimizde bilim alý úshin sapaly jaǵdaı jasaý týraly tapsyrmasyn iske asyrýdyń jarqyn úlgisi.
Mektep dırektorynyń m. a. Mánshúk Dosjanovanyń aıtýynsha, oqý mekemesi 300 orynǵa shaqtalǵan, zamanaýı oqý kabınetter, zerthanalarmen jáne IT quzyrettilikti damytý úshin arnaıy aımaqtarmen jabdyqtalǵan. Munda eki kompıýterlik kabınet jáne robototehnıka synyby, STEM-zerthana, sheberhanalar, zamanaýı kitaphana, oqý zaly, jaıly kovorkıng alańdary men qozǵalyssyz jáne belsendi oıyndarǵa arnalǵan jabdyqtalǵan alańdar, sondaı-aq sport jáne akt zaldary bar.
Mektep oqýshylardyń bilimi men shyǵarmashylyǵyn damytý úshin barlyq qajetti zattarmen jabdyqtalǵan. Onyń ishinde erekshe bilim berý qajettilikteri bar balalarǵa jaǵdaı jasaýǵa kóńil bólingen.
Tórtinshi toqsanǵa 325 bala qabyldandy, oqytý eki aýysymda júrgiziledi.
Oblys ákimi oqýshylardyń ata-analarymen kezdesýde osyndaı zamanaýı mektepterdiń qurylysy óńirdegi bilim berý sapasyn jaqsartýdaǵy mańyzdy qadam ekenin atap ótti.
— Prezıdent tapsyrmasy aıasynda biz bilim berý ınfraqurylymyn belsendi damytyp jatyrmyz. Jaıly mektepter — bul jańa ǵımarattar ǵana emes, balalarymyzdyń damýyna barlyq jaǵdaı jasalǵan zamanaýı bilim berý ortalyqtary. Oqýshylarǵa sáttilik tileımin, osyndaı jaıly jáne zamanaýı orta usynǵan barlyq múmkindikti tıimdi paıdalanǵandary jón. Bıyl oblysymyzda 11 400 oqýshyǵa arnalǵan taǵy 13 jańa jaıly mektep ashylady. Árbir oqý orny eń joǵary standarttarǵa saı bolýy úshin biz osy baǵytta odan ári jumys isteımiz, — dep atap ótti oblys ákimi.
Oqýshylardyń ata-analary alǵys sózderin de jetkizdi.
— Bul — bizge naǵyz mereke. Aqjarda taǵy bir mektep ashyldy. Meniń nemerelerim men jıenderim osynda oqıdy. Mektep óte keremet, óte ádemi. Munda dombyra synyby, qyzdar men uldarǵa arnalǵan sheberhanalar bar. Qazir balalarǵa eń jaqsysy ǵana usynylady, ata-ana retinde balalarymyzdyń jaıly jáne zamanaýı jaǵdaıda oqıtynyna senimdi bola alamyz. Muny júzege asyrǵan barsha azamattarǵa úlken rahmet, — dedi Aınagúl Sábıteeva.
Myrzabaı Babashev osy mektepti ashýǵa kómekteskenderge rızashylyǵyn bildirdi.
— Mektep óte jaqsy. Sapaly bilim alý úshin qajet nárseniń bári bar — robototehnıka kabıneti, zerthanalar, akt zaly, sport zaly. Men nemerelerimniń osyndaı jaqsy jaǵdaıda oqyp, barlyq baǵytta damıtynyna óte qýanyshtymyn. Osy mektepti ashýǵa kómektesken jandarǵa rızashylyǵymdy bildiremin, — dedi ol.
Adam kóp shoǵyrlanǵan turǵyn alaptardyń biri — Eset batyrda boı kótergen 2000 oryndyq № 82 jalpy bilim beretin orta mektep te zamanaýı jabdyqtarmen qamtamasyz etilip, ártúrli jastaǵy oqýshylarǵa beıimdelgen. Munda 55 oqý kabıneti bar, onyń ishinde 28 bastaýysh synyp kabıneti, 7 mektepaldy daıarlyq synyby, sondaı-aq hımııa, fızıka, bıologııa kabınetteri, aǵylshyn tili, IT, robototehnıka jáne STEM zerthanalary qarastyrylǵan. Oqý bloktary ǵylym, tehnologııa, ınjenerııa jáne matematıka pánderin tereńdetip oqytýǵa múmkindik beredi. Sonymen qatar, 440 balaǵa arnalǵan ashana da jumys isteıdi.
Oqý kabınetterinen bólek, mektep zamanaýı kitaphana, oqý zaly, kovorkıng-aımaqtar jáne balalardyń belsendi demalýyna arnalǵan oıyn alańdarymen jabdyqtalǵan. Erekshe bilim berý qajettilikteri bar balalar úshin arnaıy kabınetter men qoljetimdi orta jasaldy.
— Memleketimizdiń bolashaǵy jan-jaqty damyǵan, deni saý jáne mádenıetti azamattarǵa baılanysty. Sondyqtan elimizde balalarymyzdyń sapaly bilim alýyna aıyryqsha kóńil bólinip jatyr. Árbir bala, turǵylyqty jerine qaramastan, joǵary deńgeıde bilim alý múmkindigine ıe bolýy mańyzdy. Bul — árbir jaıly mekteptiń basty maqsaty. Mundaı bilim ordalary oqýshylardyń barlyq qajettiligine saı. Osyndaı mektep óńirdiń bilim berý ınfraqurylymyn nyǵaıtý jolyndaǵy mańyzdy qadam bolatynyna senimdimiz. Bolashaqta da bilim berý júıesin damytyp, árbir balanyń óz áleýetin júzege asyrýyna jáne el damýyna úles qosýyna jaǵdaı jasaımyz, — dep atap ótti óńir basshysy ata-analarmen kezdesýde.
Jańa mektepti aralap shyqqan Eset batyr turǵyn alaby turǵyndarynyń da qýanyshynda shek joq. Bilim ordasynyń ashylýy oqýshy oryndarynyń tapshylyǵy máselesin sheshti.
— Osyndaı keremet mekteptiń salynǵanyna óte qýanyshtymyn. Bul — ata-analar úshin de, muǵalimder úshin de, eń bastysy — balalar úshin naǵyz arman mektebi. Bilim salasynda kópjyldyq tájirıbem bar, biraq dál osyndaı deńgeıdegi oqý ornyn alǵash ret kórip turmyn. Munda balalarǵa erekshe qamqorlyqpen jaǵdaı qarastyrylǵan: zamanaýı kabınetter, jaıly oqý jáne demalys ortasy. Ata-analarǵa aıtarym — muǵalimdermen birge jumys isteńizder, balalaryńyzdy qoldap, olardyń ósýine jáne damýyna kómektesińizder. Sonda ǵana joǵary nátıjelerge qol jetkize alamyz. Al balalarǵa aıtarym — mektepterińdi qadirleńder, jasalǵan múmkindikterdi baǵalańdar. Bul mektep — bilim men damý ortalyǵy. Mekteptiń salynýyna atsalysqan barsha janǵa alǵysymdy bildiremin, — dedi pedagogıka salasynyń ardageri Janııa Muhambetova.
Eset batyr turǵyn alabynyń turǵyny Qaırat Nazarov mundaı mekteptiń salynýy balalary úshin úlken qýanysh ekenin aıtty.
— Osy tamasha mekteptiń boı kóterýine úles qosqan barsha janǵa rahmetimdi aıtamyn. Ata-ana retinde balalarymyzdyń osyndaı tamasha jaǵdaıda oqyp, sapaly bilim alatynyna qýanyshtymyz. Mundaı mekteptiń salynýy — biz úshin jáne balalarymyz úshin úlken qýanysh!, — dedi Nazarov.
Buǵan deıin Aqtóbedegi túzetý kabınetterinde erekshe qajettiligi balalardyń quqyǵy buzylǵany málim boldy.