Aqtóbe oblysynda dári-dármek tıelgen júk kóligi túgi qalmaı janyp ketti

AQTÓBE. KAZINFORM — «Samara-Shymkent» respýblıkalyq avtojolynyń 794-shaqyrymynda Hromtaý aýdanynda dári-dármek tıelgen júk kóliginen órt shyqty. 

Kólik rýlindegi 33 jastaǵy júrgizýshi qutqarylyp, jedel medıtsınalyq járdem brıgadasynyń qyzmetkerlerine berildi.

Órt sóndirýshiler qońyraý túsken sátten bastap 32 mınýt ishinde jalyndy aýyzdyqtady.

Ottyń neden tutanǵany anyqtalyp jatyr.

«Eger kólik júrip bara jatqanda órt shyqsa, jol jıegine toqtaý kerek. Qozǵaltqyshty óshirip, kólikti qol tejegishine qoıý kerek. Búkil jolaýshylardy salonnan shyǵaryp, qujattaryńyzdy alyp, órt týraly 112 nómirine habarlańyz» dep eskertedi TJM.