Aqtóbe oblysynda bir aptada 123 myńnan astam túp jasyl jelek otyrǵyzyldy
AQTÓBE. KAZINFORM – «Taza Qazaqstan» respýblıkalyq aktsııasy aıasyndaǵy «Jasyl aımaq» aptalyǵynda aıasynda oblys aýmaǵynda 123 myńnan astam kóshet egildi.
Búgin oblys kóleminde ótken jappaı aǵash otyrǵyzý sharasyn óńir basshysy Ashat Shaharov bastap, kópshilikpen «Anaǵa taǵzym» rýhanı-adamgershilik ortalyǵynyń aınalasyn kóshettermen kómkerdi. 25 shyrshany turǵyndar, «Eren-grýpp» JShS, «Nomad City» JShS, «Nektar» ÓK, «Build Company» JShS sııaqty qurylys salýshy kompanııalar otyrǵyzdy.
Oblys ortalyǵyndaǵy Altyn Orda yqsham aýdanynda memlekettik qyzmetshiler 650 kúl aǵashy, Trıatlon saıabaǵynda aýmaqtyq departamentterdiń 20 shyrshasy, Ortalyq saıabaqta onyń aýmaǵyn jalǵa alýshylardyń 100 kúl aǵashy bar.
Sondaı-aq, qala turǵyndary, depýtattar, túrli jastar uıymdary, kásiporyndar, eńbek ujymdary 2000 shyrsha, kúl aǵashymen belgilengen aýmaqtardy kómkerip, týǵan ólkeni kógaldandyrdy.
Jalpy, oblys aýmaǵynda ótken «Jasyl aımaq» aptalyǵynda eń kóp aǵash Yrǵyz aýdanynda otyrǵyzyldy, 84 myń túp. Sonymen qosa, Shalqar aýdanynyń Jyltyr aýylynda qumdy toqtatý maqsatynda 25 myń, Aqtóbe qalasyn kógaldandyrý úshin 10 myń jasyl jelek egildi. Sharaǵa qalǵan aýdandarda da qomaqty úles qosty.
Kóshetter Aqtóbe oblysynyń orman sharýashylyǵyna qarasty 7 tálimbaqtan alyndy. Áleýmettik nysandar: emhana, mektepter, balabaqshalarǵa jasyl jelekter tegin taratyldy.
Aqtóbe óńirin abattandyrý jáne kógaldandyrý jumystary josparǵa sáıkes jalǵasa beredi.
