Aqtóbe oblysynda bes kásiporyn sýdy zańsyz paıdalanǵan

ASTANA. KAZINFORM — Jaıyq-Kaspıı basseındik ınspektsııasy Aqtóbe bólimshesiniń mamandary sý qoryn qorǵaý jáne paıdalaný talaptaryna qatysty oblystyń bes kommýnaldyq memlekettik kásipornyna tekserý júrgizdi.

Nátıjesinde óńirdiń Qobda jáne Qarǵaly aýdandarynda, sondaı-aq Aqtóbe qalasynyń Aqjar-1, Qyzyljar, Qarǵaly, Joǵarǵy Qarǵaly, Órleý jáne Sazdy turǵyn aýdandarynda jerasty sýlaryn zańsyz paıdalaný faktileri anyqtaldy. Eki kásiporynnyń sý burýǵa ruqsaty bolmaǵany anyqtaldy.

«Ákimshilik quqyq buzýshylyq týraly kodekstiń 462-babynyń 3-tarmaǵyna sáıkes, 5 kommýnaldyq sharýashylyqqa sý paıdalanýǵa arnaıy ruqsattyń joqtyǵy úshin aıyppul salyndy. Barlyǵy 3,7 mln teńge óndirildi», – dedi Jaıyq-Kaspıı basseındik ınspektsııasynyń basshysy Erǵalı Úmbetbaev.

Buǵan deıin Qyzylorda oblysynda 6 sharýa qojalyǵy 2,3 mln tekshe metrden astam sýdy zańsyz paıdalanǵany anyqtalǵan bolatyn.

Al Aral-Syrdarııa basseındik ınspektsııasynyń mamandary Shardara aýdandyq prokýratýrasymen birlesip, Túrkistan oblysynda tirkelmegen 24 sorǵy qondyrǵysyn anyqtady.

Aıta keteıik, Tentek ózenindegi sý nysany 50 jyldan keıin alǵash ret jańartylady.