Aqtóbe oblysynda aıyppulmen qutylǵan sheneýnik polıtseı endi túrmede otyratyn boldy
Alaıaqtyq jolmen aqsha tapqysy kelgen Aqtóbe oblysy Muǵaljar aýdandyq polıtsııa bólimi bastyǵynyń orynbasary jáne oǵan kómektesken adamǵa qatysty is apellıatsııalyq shaǵymmen qaıta qaraldy, dep habarlaıdy Kazinform.
Aqtóbe oblystyq sotynyń Qylmystyq ister jónindegi sot alqasy Muǵaljar aýdandyq sotynyń úkimin apellıatsııalyq tártipte qaıta qarady. Іs materıalyna súıensek, Muǵaljar aýdandyq polıtsııa bólimi bastyǵynyń orynbasary qylmystyq istiń oń aıaqtalýy úshin 900 myń teńge aqsha alýǵa oqtalǵan. Oǵan tanysy kómektespek boldy. Alaıda olardy QR Sybaılas jemqorlyqqa qarsy agenttik departamentiniń qyzmetkerleri ustaǵan.
Birinshi satydaǵy sot aýdandyq polıtsııa bólimi bastyǵynyń orynbasaryn laýazymdy adam bola tura, óziniń qyzmet babyn paıdalaný arqyly aldaý jáne senimdi teris paıdalaný jolymen bótenniń múlkin jymqyrýǵa oqtalǵany (Qylmystyq kodeksiniń 24-baby 3-bóligi, 190-baby 3-bóligi 2-tarmaǵy) úshin kináli dep tanyp, oǵan 9 mıllıon teńge aıyppul taǵaıyndady.
Bótenniń múlkin jymqyrýǵa kómekteskeni úshin tanysyna 3 mln 450 myń aıyppul salyndy.
«Keıin prokýror ony bas bostandyǵynan aıyrýdy, al qorǵaýshy ekeýin de aqtap, úkimniń kúshin joıýdy surap, apellıatsııalyq shaǵym túsirdi.
Sot alqasynyń qaýlysymen úkim ózgertilip, Muǵaljar aýdandyq polıtsııa bólimi bastyǵynyń orynbasary memlekettik qyzmette laýazymdardy atqarý quqyǵynan ómir boıyna aıyryldy. Sonymen birge 4 jyl merzimge bas bostandyǵynan aıyrý jazasy taǵaıyndaldy.
Ekinshi sottalýshyǵa taǵaıyndalǵan jaza ózgerissiz qaldyryldy. Apellıatsııalyq qaýly zańdy kúshine endi»,- dep habarlady Aqtóbe oblystyq sotynyń baspasóz qyzmetinen.
