Aqtóbe oblysynda avtobýs aýdarylyp, 5 adam kóz jumdy

AQTÓBE. KAZINFORM – Jol-kólik oqıǵasy 7 jeltoqsan kúni saǵat 08:40 shamasynda Samara–Shymkent tasjolynda boldy. 

Ulǵaısyn aýyly mańyndaǵy jol apatynan 5 jolaýshy kóz jumdy. 

– Júrgizýshi Qarabutaq aýylynan Qyzylorda oblysyna qaraı baǵyt alǵan kezde Áıtekebı aýdanyna qarasty Ulǵaısyn aýylynyń mańynda aýdaryldy. Avtobýs salonynda Perm–Tashkent baǵytynda jolǵa shyqqan Ózbekstan Respýblıkasynyń 49 azamaty bolǵan. Jol apatynan 5 jolaýshy oqıǵa ornynda kóz jumdy, 11 jolaýshy túrli dene jaraqattarymen Áıteke bı aýdandyq aýrýhanasyna jetkizildi, - dep habarlady oblystyq PD baspasóz qyzmeti.

Aqtóbe oblystyq densaýlyq saqtaý basqarmasynyń habarlaýynsha, aýrýhanaǵa jetkizilgen 15 jolaýshynyń 13-i dárigerlerge qaralǵan soń jiberildi. Olarda jeńil jaraqat bar. Bireýine gıps salyndy. Al eki adam qazir aýrýhanada jatyr. Bir naýqasqa ota jasalyp, synyq tańyldy. Ekinshisi jabyq bas-mı jaraqatyn alǵan.

Qazir jol-kólik oqıǵasy boıynsha sotqa deıingi tergep-tekserý bastaldy. 

Eske salsaq, 5-jeltoqsan kúni Aqtóbede úsh kólik soqtyǵysyp, júrgizýshi men jolaýshy kóz jumdy. Jol-kólik apaty Aqtóbe qalasyndaǵy kópir mańynda boldy.