Aqtóbe oblysynda aýyl sharýashylyǵy eńbekkerleri marapattaldy

AQTÓBE. KAZINFORM - Búgin Aýyl sharýashylyǵy qyzmetkerleri kúnine oraı, salada tynymsyz eńbek etip júrgen azamattar memlekettik nagradalar men qurmet gramotalaryn ıelendi, dep habarlaıdy Aqtóbe oblysy ákimdiginiń baspasóz qyzmeti.

Ozat eńbekkerlerge oblys ákimi Ashat Shaharov marapattardy tabystady.

Jıynda aldymen sóz sóılegen aımaq basshysy bıyl óńirimizde sý tasqyny bolǵanyna qaramastan, egin bitik shyǵyp, sharýalar jyldy jaqsy kórsetkishtermen aıaqtap otyrǵanyn jetkizdi.

Atap aıtsaq, bıyl oblysta mal basynyń ortasha ósimi 8 paıyzǵa jetse, dıqandar gektaryna 14 tsentnerden ónim aldy. Osylaısha óńir boıynsha 600 myń tonnaǵa jýyq astyq jınaldy.

Budan keıin oblys ákimi óńirde eńbek etip júrgen sharýa qojalyqtarynyń basshylary men jumysshylaryna memlekettik jáne Aýyl sharýashylyǵy mınıstrliginiń vedomstvolyq nagradalaryn tabys etti.

Atap aıtsaq, ІІІ dárejeli «Eńbek dańqy» ordenimen Áıteke bı aýdany «Qumqudyq» JShS mehanızatory Erǵalı Malaıdarov, Qarǵaly aýdany «Stepnoe» JShS malshysy Batyrqan Tóleýov, Hromtaý aýdany «Jantizer» sharýa qojalyǵynyń shopany Qaırat Orazalın marapattalsa, «Eren eńbegi úshin» medalin Mártók aýdanyndaǵy «Aıs» JShS saýynshysy Asylbek Ertileýov pen oblystyń bas fıtopotologi Aınagúl Túlekbaeva aldy.

Sondaı-aq bir top azamatqa Aýyl sharýashylyǵy mınıstrliginiń «Eńbek ardageri» medali, «Aýyl sharýashylyǵy salasynyń úzdigi» tósbelgisi jáne Qurmet gramotasy tabystaldy.

Saltanatty jıyn sońynda oblystyq ardagerler keńesiniń tóraǵasy Serik Shańǵutov sóz sóılep, óńirdiń aýyl sharýashylyǵy salasyn órkendetýge qosqan úlesteri úshin jınalǵandarǵa óz rızashylyǵyn jetkizdi.