Aqtóbe oblysynda aldyn ala esep boıynsha sý tasqynynan 51 mlrd teńge shyǵyn keldi
AQTÓBE. KAZINFORM – Aqtóbe oblysynda sý tasqynynan kelgen shyǵyn shamamen 51 mlrd teńge bolady. Shyǵyn kólemi áli de ózgerýi múmkin. Búgin oblystyq máslıhattyń kezekten tys 12-shi sessııasynda qarjyny qaıdan alyp, qalaı jumsalatyny týraly aıtyldy.
Aqtóbe qalasy men Áıteke bı, Yrǵyz, Qobda, Muǵaljar, Temir, Oıyl aýdandarynda jergilikti mańyzǵa ıe tótenshe jaǵdaı jarııalanyp tur. Qazirgi kezde komıssııa jumys istep, tasqyn shyǵynyn eseptep jatyr. Óńirde úıler qulady, joldardy sý shaıdy, kópir jaramsyz kúıge tústi, áleýmettik nysandarǵa sý kirip, búlindi. Boljam boıynsha shyǵyn kólemi 51 mlrd teńgeden asady.
- Qajetti qarjy kólemi 51 mlrd teńgeden astady. Onyń ishinde 529 turǵyn úı qurylysy men ınjenerlik-kommýnıkatsııalyq ınfraqurylym salýǵa 22 mlrd teńge, ótemaqy tóleý túrindegi zalaldy óteýge 6,6 mlrd teńge, oblystyq jáne aýdandyq mańyzy bar 25 jol ýchaskesin jáne 12 kópirdi salý jáne jóndeýge 10,2 mlrd teńge, sý kirgen áleýmettik nysandardy jóndeýge 7,5 mlrd teńge, mal shyǵyny úshin ótemaqy tóleýge 2,2 mlrd teńge qajet. Qazirgi tańda Qarjy mınıstrligimen sý tasqynynyń saldaryn joıý jónindegi is-sharalar jospary bekitildi. Bekitilgen josparǵa sáıkes bıýdjettik baǵdarlama ákimshileri salalyq mınıstriliktermen birge jumys istep jatyr,- dedi Aqtóbe oblystyq Qarjy basqarmasynyń basshysy Nurlybek Ónerbaev.
Onyń aıtýynsha, 51 mlrd teńgeniń 40 mlrd teńgesin respýblıkalyq bıýdjetten bólýge usynys engizildi. Sóıtip bul qarjyǵa úı salý, ınfraqurylym júrgizý, jol men kópir qurylysy, áleýmettik nysandardy qalpyna keltirý jumysy atqarylmaq. Respýblıkalyq bıýdjet esebinen tasqyn kezinde zardap shekken 2 mektep, 1 balabaqsha, 2 densaýlyq saqtaý mekemesi jáne 3 mádenıet nysanyn jóndeýge 4,6 mlrd teńge suralady. Al qalǵan 10 mlrd teńge oblystyq bıýdjet rezervinen qarastyrylady. Shamamen 916 otbasyna tólenetin ótemaqyǵa 3,6 mlrd teńge, 15 áleýmettik nysannyń ǵımarattaryn jóndeýge 7,5 mlrd teńge dep eseptelgen.
- Aqtóbede 1,5 myńnan astam turǵyn úı men saıajaıdaǵy úıge zaqym keldi. Ázirge onyń 529-y jaramsyz. Qazir tıptik joba ázirlenip jatyr. Ony respýblıkalyq bıýdjet esebinen óteý kózdelip otyr. Shamamen 22 mlrd teńge bólinedi. Bul aldyn ala boljam ǵana,- dedi Aqtóbe oblystyq Qarjy basqarmasynyń basshysy Nurlybek Ónerbaev.
