Aqtóbe oblysynda alaıaqtardyń aqshasyn krıptovalıýtaǵa aınaldyrǵan top ustaldy
ASTANA. KAZINFORM — Qarjy monıtorıng agenttigi Aqtóbe oblysy boıynsha departamenti ınternet-alaıaqtyqqa járdemdesý, zańsyz kásipkerlik, dropperlik qyzmetti uıymdastyrý jáne qylmystyq jolmen alynǵan kiristerdi zańdastyrý faktileri boıynsha sotqa deıingi tergep-tekserý júrgizip jatyr.
Tergeý málimetterine qaraǵanda, Aqtóbe aýmaǵynda telefon jáne ınternet-alaıaqtyq saldarynan azamattardan jymqyrylǵan aqshalaı qarajatty qabyldaý, konvertatsııalaý jáne zańdastyrýdyń turaqty shemasyn qurǵan qylmystyq top áreket etken. Top quramynda onnan astam adam bolǵan. Qylmystyq shemany júzege asyrý úshin uıymdastyrýshylar 150-den astam dropperdi tartqan.
— Qylmystyq top músheleri bank qosymshalary men krıptoámııandar aldyn ala ornatylǵan uıaly telefondardy paıdalanǵan. Bul olarǵa dropperlerdiń shottaryn qashyqtan basqarýǵa jáne qarjylyq operatsııalardy olardyń qatysýynsyz júrgizýge múmkindik bergen, — dep habarlady vedomstvo ókili.
Blokcheın-taldaý quraldarynyń kómegimen jymqyrylǵan qarajatty zańdastyrýdyń tolyq shemasy qalpyna keltirildi. Áýeli jábirlenýshilerdiń aqshalaı qarajaty tranzıttik banktik shottar arqyly ótkizilip, keıin baqylaýdaǵy dropperlerdiń shottaryna aýdarylǵan. Odan keıin qarajat krıptovalıýta platformasyna jiberilip, onda USDT tsıfrlyq aktıvterin satyp alýǵa paıdalanylǵan.
— Operatsııalarǵa zańdy sıpat berý maqsatynda jalǵan qaryz sharttary men jalǵan kompanııalar qoldanylǵan. Qylmystyq shemanyń sońǵy kezeńinde zańsyz kirister qolma-qol aqshaǵa aınaldyrylyp, shetel valıýtasyna aıyrbastalǵan, — delingen habarlamada.
️Qazirgi ýaqytta elimizdiń 16 óńirinen 80 jábirlenýshi anyqtaldy. Keltirilgen zalaldyń jalpy somasy 120 mln teńgeden asty. Qylmystyq toptyń 8 múshesi qamaýǵa alyndy. Taǵy eki kúdiktige qatysty úıqamaq túrindegi bultartpaý sharasy qoldanyldy. Sot sanktsııasymen kúdiktilerdiń múlkine, onyń ishinde 8 páterge, bir avtokólikke jáne 52 myń USDT kólemindegi tsıfrlyq aktıvterge tyıym salyndy.
Tergep-tekserý jalǵasyp jatyr. Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etilmeıdi.
Eske salaıyq, buǵan deıin Sax Invest qarjy pıramıdasynyń uıymdastyrýshylary 7 jylǵa sottalǵanyn habarlaǵan edik.
