Aqtóbe oblysynda alaıaqtar sýbsıdııaǵa bólingen 1 mlrd teńgege jýyq qarjyny jymqyrdy
ASTANA. KAZINFORM - Qarjylyq monıtorıng agenttigi «Sybaǵa» memlekettik baǵdarlamasy aıasynda «Agrarlyq nesıe korporatsııasy» AQ Aqtóbe fılıalynan nesıe alý kezindegi alaıaqtyq faktilerin anyqtady.
Agenttiktiń baspasóz qyzmetiniń habarlaýynsha, tergeý barysynda 4 sharýa qojalyǵynyń ókilderi jalǵan qujattardy paıdalana otyryp, asyl tuqymdy múıizdi iri qara satyp alýǵa bólingen memlekettik sýbsıdııalar men kredıttik qarajatty qoldy qylǵan úsh azamat anyqtaldy.
Olar memleketke jalpy somasy 1 mlrd teńgege jýyq iri mólsherde zalal keltirildi.
Sotqa deıingi tergeý barysynda zalal óteldi.
Agroónerkásiptik keshen salasyndaǵy asa iri mólsherdegi alaıaqtyq úshin sot úkimimen úsh adam 5 jylǵa bas bostandyǵynan aıyryldy.
Sottalýshylardyń jyljymaly jáne jyljymaıtyn múlikteri memleket paıdasyna tárkilendi.
Memleket basshysynyń tapsyrmasyn oryndaý aıasynda Qarjylyq monıtorıng agenttigi AÓK salasyn damytýǵa bólinetin sýbsıdııalar men kredıttik qarajattardyń oryndy jumsalýyna turaqty túrde monıtorıng júrgizýde. Bul jumys adal kásipkerlerdiń quqyqtaryn qorǵaýǵa baǵyttalǵan.
«Eger siz ókilettikterdi teris paıdalaný, qarajatty jymqyrý nemese basqa da ekonomıkalyq quqyq buzýshylyqtar faktileri jaıly bilseńiz, «AFM Insider» telegram botyna habarlaýyńyzdy suraımyz. Anonımdilikke kepildik beriledi»,-delingen habarlamada.
Osyǵan deıin otandyq agrobıznesti yntalandyrý úshin sýbsıdııa kólemi artatyny habarlandy.
