Aqtóbe oblysynda abattandyrý boıynsha 600-ge quqyqbuzýshylyq anyqtaldy
ASTANA. KAZINFORM — Aqtóbe oblysynda «Taza Qazaqstan» ekologııalyq aktsııasy aıasynda tazalyq pen tártipti saqtaý boıynsha jumystar jalǵasyp jatyr, dep habarlaıdy Polisia.kz.
Qala kósheleri men aýlalaryn taza ustaýǵa tyrysyp júrgen turǵyndardyń arasynda, ókinishke qaraı, qoqysty kez kelgen jerge tastap ketetin azamattar da kezdesedi.
Ýchaskelik polıtsııa ınspektorlary ózderine bekitilgen aýmaqtarda turaqty túrde profılaktıkalyq is-sharalar júrgizedi. Ruqsat etilmegen jerlerge qoqys tastaý, qoǵamdyq oryndardy lastaý jáne abattandyrý talaptaryn buzý faktileri anyqtalýda.
Jyl basynan beri polıtsııa qyzmetkerleri abattandyrý salasynda 600-ge jýyq quqyq buzýshylyqty anyqtady. Árbir fakti boıynsha qoldanystaǵy zańnamaǵa sáıkes tıisti sharalar qabyldanýda.
— Polıtseıler turǵyndarǵa qarapaıym erejeni eske salady. Qoqys salynǵan paket ózdiginen qoqys jáshigine barmaıdy, al bótelke de ózdńgimen joǵalyp ketpeıdi. Sondyqtan qoqysty arnaıy belgilengen orynǵa jetkizý — ár adamnyń mindeti. Quqyq qorǵaý qyzmetkerleri turǵyndarmen túsindirý jumystaryn júrgizip, abattandyrý erejelerin saqtaýǵa, qoǵamdyq oryndardy lastamaýǵa jáne qorshaǵan ortaǵa uqypty qaraýǵa shaqyrady. Qalanyń tazalyǵyn tek polıtsııa qamtamasyz ete almaıdy. Bireý qoqys tastaıdy, endi bireý ony jınaıdy. Sondyqtan eń durysy — qoqysty alǵashqyda-aq belgilengen jerge tastaý, — delingen aqparatta.
Aıta keteıik, Shyǵys Qazaqstan oblysynda «Taza Qazaqstan» aktsııasy aıasynda bıyl 6 myńnan astam quqyqbuzýshylyq anyqtaldy.
