Aqtóbe oblysynda 865 myń gektar aýyl sharýashylyǵy jerine egin egiledi
ASTANA. KAZINFORM – Óńirde bıylǵy kóktemgi dala jumystaryna daıyndyq josparly túrde jalǵasyp jatyr. Bıyl 865 myń gektar alqapty qamtý josparǵa engizilgen. Bul týraly Aýyl sharýashylyǵy mınıstrliginiń baspasóz qyzmeti habarlady.
Qurylymyna sáıkes dándi daqyldar 506 myń gektarǵa, maıly daqyldar 75 myń gektarǵa, mal azyqtyq daqyldar 277 myń gektarǵa egiledi. Kartop 3,5 myń gektarǵa, al kókónis-baqsha daqyldary 3,3 myń gektarǵa otyrǵyzylmaq.
2026 jylǵy ónimge arnap 283 myń gektar jer daıyndaldy. Onyń ishinde 170 myń gektary – súri jer, 113 myń gektary – kúzgi jyrtylǵan jer (zıab). Bul sapaly egis naýqanyn ótkizýdiń negizi.
Bekitilgen qurylymǵa sáıkes kóktemgi egis jumystaryn júrgizý úshin 49 myń tonna aýyl sharýashylyǵy daqyldarynyń tuqymy qajet. Qazirgi tańda 44 myń tonna nemese qajettiliktiń 90%-y daıyndaldy. Aldyn ala júrgizilgen sapa saraptamasy nátıjesinde ázirlengen tuqymnyń 99%-y joǵary sanatqa sáıkes keletini anyqtaldy. Egis naýqany bastalǵanǵa deıin sharýalar qajetti tuqym materıalymen tolyq qamtamasyz etiledi.
Shamamen 1,5 myń traktor, 100-den astam joǵary ónimdi egis kesheni, 1,4 myń sepkish jáne 1,8 myń topyraq óńdeý tehnıkasy jumyldyrylmaq. Aýyl sharýashylyǵy tehnıkasynyń daıyndyǵy 90%-dy quraıdy.
Aqtóbelik fermerler kóktemgi dala jáne egin jınaý jumystaryn jyldyq 5% mólsherlememen jeńildetilgen nesıeleý tetigin belsendi qoldanýda. «Keń dala-2» baǵdarlamasy aıasynda 2025 jylǵy qarasha aıynan bastap 1,7 mlrd teńge kóleminde kredıt berildi.
Ósimdik sharýashylyǵy salasyn sýbsıdııalaýǵa 2,1 mlrd teńge qarastyrylǵan. Onyń ishinde 400 mln teńge tuqym sharýashylyǵyn damytýǵa, 383 mln teńge basym daqyldar óndirisiniń ózindik qunyn arzandatýǵa, 500 mln teńge mıneraldy tyńaıtqyshtardyń qunyn tómendetýge, 850 mln teńge pestıtsıdterdiń qunyn sýbsıdııalaýǵa baǵyttalǵan. Jalpy alǵanda, óńirde kóktemgi dala jumystaryna daıyndyq óz deńgeıinde júrgizilip jatyr.
Osyǵan deıin BQO-da eginshilikte 60 900 tonna tyńaıtqysh engizý kózdelip otyrǵanyn jazǵanbyz.