Aqtóbe oblysynda 798 nysan múmkindigi shekteýli jandarǵa tolyq beıimdeldi
ASTANA. KAZINFORM - Múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda Aqtóbe oblysynda 798 áleýmettik ınfraqurylym nysany tolyq beıimdeldi.
Qazirgi ýaqytta elimizde Qazaqstan Respýblıkasynda múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deıingi ulttyq jospar, «Amanat» partııasynyń 2023 – 2027 jyldardaǵy jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylýda.
«Amanat» partııasynyń jol kartasynda 2023 – 2027 jyldar aralyǵynda Interaktıvti qoljetimdilik kartasyna (budan ári – Karta) engizilgen 35 myńnan astam nysandy beıimdeý boıynsha jumys kózdelgen. Jyl saıyn obektilerdiń 20 %-y beıimdelýge jatady.
Osylaısha, 2023 jyly – Kartadaǵy obektilerdiń 20%, 2024 jyly – 40%, 2025 jyly – 60%, 2026 jyly – 80%, 2027 jyly – 100%. Qazirgi ýaqytta el boıynsha 16 541 obekt tolyǵymen beıimdelgen.
Osy jyldyń sońyna deıin Aqtóbe oblysy boıynsha 517 nysandy beıimdeý josparlanǵan, óńirde jospar artyǵymen oryndalyp, 798 nysanda beıimdeý jumystary júrgizildi.
Máselen, óńirdegi 798 obektiniń ishinen tómendegi obektiler múgedektigi bar adamdardyń barlyq sanattary úshin qol jetimdi:
- densaýlyq saqtaý obektileri – 114;
- bilim berý obektileri – 375;
- mádenıet nysandary – 103;
- saýda jáne qyzmet kórsetý obektileri – 33;
- memlekettik uıymdar – 131;
- sport nysandary – 7;
- kólik ınfraqurylymynyń obektileri – 6;
- qoǵamdyq tamaqtandyrý obektileri – 3;
- áleýmettik qorǵaý obektileri – 2;
- basqalary – 24.
«Aqtóbe oblysy Shalqar qalasynda múgedektigi bar adamdarǵa arnalǵan qyzmetterge qoljetimdilik jaqsara túsken. Temirjol vokzalynda taktıldi kórsetkishter, dybystyq mnemosulba ornatylǵan, kirý esikteri keń – bıletterdi satyp alý barysynda eshqandaı kedergi keltirmeıdi. Budan basqa, Halyqqa qyzmet kórsetý ortalyǵy men jumyspen qamtý jáne áleýmettik baǵdarlamalar bóliminiń ǵımaratynda pandýstar ornatyldy, esh kedergisiz kirip, qajetti qyzmetterdi alýǵa bolady», – dedi 1-top múgedektigi bar Jarqynaı Tileýbaeva.
Budan basqa memlekettik baqylaý sheńberinde Halyqty áleýmettik qorǵaý salasyndaǵy retteý jáne baqylaý komıtetiniń Aqtóbe oblysy boıynsha departamenti bıyl memlekettik basqarý, densaýlyq saqtaý, áleýmettik qorǵaý, mádenıet, jeke kásipkerlik jáne t.b. salalardaǵy áleýmettik ınfraqurylym obektilerine 24 tekserý júrgizdi, onyń ishinde jospardan tys 1 tekserý, profılaktıkalyq baqylaý boıynsha 23 tekserý boldy.
Tekserý qorytyndysy boıynsha anyqtalǵan buzýshylyqtardy joıý týraly 23 uıǵarym berilip, 55 myń teńgeden astam somaǵa 1 ákimshilik aıyppul salyndy.
Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpastan joıý týraly nusqamalar ǵana beriletinin atap ótý qajet. Nusqama belgilengen merzimde oryndalmaǵan jaǵdaıda aıyppul salynady.
