Aqtóbe oblysynda 467 km elektr jelisi jańartylyp, JEO-da 3 qazandyq jóndeledi
ASTANA.KAZINFORM – Bul týraly Energetıka vıtse-mınıstri Erlan Aqbarov Aqtóbe oblysynyń turǵyndarymen kezdesýi barysynda málim etti, dep habarlaıdy QR Energetıka mınıstrliginiń baspasóz qyzmeti.
Baspasóz qyzmetiniń málimetterine qaraǵanda, Aqtóbe oblysynda energetıkalyq ınfraqurylymdy jańartý jumystary júrgizilip jatyr. 2026 jyly 3,7 myń turǵyny bar 8 aýyldy gazdandyrý josparlanǵan. Jyl sońyna deıin 211 eldi meken nemese 904,5 myń adamdy gazben qamtamasyz etý kózdelip otyr.
Sondaı-aq negizgi energııa nysandarynda jumystar qarastyrylǵan: Aqtóbe JEO-da 3 qazandyq pen 4 týrboagregat jańartylady, al «Qazhrom» elektr stantsııasynda bý týrbınasyna kúrdeli jóndeý júrgiziledi. Oǵan qosa, 467 km elektr jelisin jańartý josparlanǵan.
Budan bólek, óńirde jańartylatyn energııa kózderi damyp keledi: jalpy qýaty 346 MVt bolatyn 7 JEK nysany jumys isteıdi, al 2028 jylǵa deıin qýaty 300 MVt bolatyn taǵy 3 jobany iske qosý josparlanǵan.
Kezdesý barysynda turǵyndar ınfraqurylymdy jańartý, elektr jelilerine qosylý, munaı ken oryndaryn ıgerý jáne jańartylatyn energııa kózderin damytý máselelerin kóterdi. Erlan Aqbarov barlyq suraqtarǵa jaýap berip, kóterilgen máseleler Energetıka mınıstrligi basshylyǵynyń baqylaýynda bolatynyn atap ótti.
Osyǵan deıin energetıkadaǵy tsıfrlyq transformatsııa týraly jazdyq.
