Aqtóbe oblysynda 43 merdiger uıym joldardy qysqy kútip ustaýǵa jaýapty
AQTÓBE. KAZINFORM – Aqtóbe oblysynyń ákimi Ashat Shaharovtyń tóraǵalyǵymen ótken apparat májilisinde óńirdegi avtomobıl joldaryn qysqy kútip ustaýǵa daıyndyq sharalary qaraldy.
Aqtóbe oblysynyń jolaýshylar kóligi jáne avtomobıl joldary basqarmasynyń basshysy Aıbek Qaıyr jergilikti joldardy kútip ustaý úshin 2025 jylǵa 2,7 mlrd. teńge qarastyrylǵanyn habarlady. Bul soma oblystyq máslıhattyń taıaýdaǵy sessııasynda bekitiledi.
Oblystaǵy joldardyń jalpy uzyndyǵy – 4 440 shaqyrym, onyń ishinde oblystyq mańyzy bary – 1 265 shaqyrym jáne aýdandyq mańyzy bary – 3 175 shaqyrym. Bul joldardy qysta kútip ustaýǵa 43 merdiger uıym jaýapty. 401 birlik tehnıka, bes myń tonna ınertti materıal, 965 tonna dızel otyny ázirlendi. Aıbek Qaıyr atap ótkendeı, jylý pýnktterin daıyndaý jáne olardy qajetti azyq-túlik qorymen qamtamasyz etý, sondaı-aq jol boıyndaǵy sý ótkizý qubyrlaryn tazalaý jumystary aıaqtalyp qaldy.
«QazAvtoJol» UK» AQ oblystyq fılıalynyń dırektory Aıbol Danaǵuldyń aıtýynsha, kompanııa respýblıkalyq mańyzy bar 1869 shaqyrym jolǵa qyzmet kórsetedi. Onyń 117 shaqyrymy qazir jóndelýde. Jumysty aıaqtaý protsesin jedeldetý úshin qosymsha tehnıka tartyldy.
«Joldarda 101 qarly ýchaske bar. Onyń 28 ýchaskesinde 86 shaqyrym temirbeton qorshaýlar ornatyldy. Qalǵan ýchaskelerge ýaqytsha aǵash qalqandar qoıylady. Sondaı-aq, qar qursaýynda qalǵan júrgizýshiler men jolaýshylar úshin 15 jylytý pýnkti daıyndaldy. 28 arnaıy tehnıka jumyldyryldy. Jetispeıtin tehnıka jalǵa alynady. Qazir ınertti materıaldar daıyndalýda. Jalpy 9400 tonna qum men 2020 tonna tuz daıyndaý josparlanýda», - dedi Aıbol Danaǵul.
Qysta kólik keptelisin boldyrmas úshin «Samara-Shymkent» respýblıkalyq mańyzy bar avtojolynyń «Aqtóbe-Hromtaý-Qarabutaq» baǵytyndaǵy ýchaskelerde aınalma joldar jasaldy. Sonymen qatar, qarly boran bolǵan jaǵdaıda kólik úshin qosalqy turaqtar daıyndalady. Olardyń biri - Hromtaý aýdany Aqjar aýylynyń tusynda ashylǵan.
Qala ákiminiń orynbasary Juldyzbek Bısembın óz kezeginde oblys ortalyǵyndaǵy joldardy kútip ustaý máselesi týraly baıandady. Qala 24 ýchaskege bólingen, olardyń árqaısysyn qysta kútip ustaýǵa jaýapty merdiger uıym bekitilgen. Qysta kóshelerdi tazalaýǵa 350 birlik tehnıka shyǵady. Qalany qardan tazartý úshin kúndizgi aýysymda 30 brıgada (40 tıegish, 150 júk kóligi) jáne túnde 20 brıgada (20 tıegish, 60 júk kóligi) jumyldyrylady. Merdigerler qazirdiń ózinde 1250 tonna tuz, 1830 tonna qum-tuz qospasy jáne 2000 tonnadan astam qum jınaǵan.
Daıyndyq sharalary týraly aıta kele, qala ákiminiń orynbasary el boıynsha eń tómen sanalatyn joldardy qysqy kútip ustaý tarıfterin qaıta qaraý qajettigin atap ótti.
Ashat Shaharov oblysta joldardy qysqy kútip ustaýǵa daıyndyq týraly baıandamalardy tyńdap bolǵan soń, tolyq daıyndyqty, aýa raıy jaǵdaılaryna ýaqytyly den qoıýdy jáne qozǵalystyń barlyq qatysýshylary úshin qaýipsizdikti qamtamasyz etýdi tapsyrdy.
«Joldarda qaýipsizdikti qamtamasyz etý jáne qys mezgilinde júrgizýshiler úshin táýekelderdi azaıtý qajet. Joldardy jóndeýdi ýaqytyly aıaqtaýǵa jáne qolaısyz aýa-raıyna jedel den qoıýǵa erekshe nazar aýdarý mańyzdy. Barlyq jumys aýa raıy jaǵdaılary men halyqtyń qajettilikterin eskere otyryp júrgizilýi tıis. Qardyń saldaryn tez arada joıý ǵana emes, sonymen qatar aldyn-ala daıyndalý – jylý pýnktterin, qum men tuz qoryn uıymdastyrý, qorshaýlar men arnaıy tehnıkanyń bolýyn qamtamasyz etý kerekpiz. Joldarda qaýipsiz júrý úshin jaǵdaılar barlyq negizgi ýchaskelerde qamtamasyz etilýi tıis», - dep atap ótti ákim.
