Aqtóbe oblysynda 300-ge jýyq daıyn baspana satyp alyndy
AQTÓBE. KAZINFORM — Oblys ákimi Ashat Shaharov Bolat Ótemuratov qorynyń dırektory Marat Aıtmaǵambetovpen birge sý tasqynynan zardap shekken turǵyndarǵa Aqtóbe qalasynan berilgen úılerdi aralap kórdi. Bul týraly oblystyq ákimdiktiń baspasóz qyzmeti málim etti.
Aldymen meımandar jas otbasy Aıbek Tasenovtiń úıine bardy. Buǵan deıin Azf-6 baý-baqsha ujymynda turǵan olardyń qýanyshynda shek joq. Altynorda yqsham aýdanynan berilgen úıi — eki bólmeli.
Óńir basshysy men qor dırektory jańa qonys ıesi Aıgúl Ramadanovaǵa da qutty bolsyn aıtty. Sý tasqynan zardap shekken turǵynnyń burynǵy Ývd-4 baý-baqsha ujymyndaǵy úıi apattyq jaǵdaıda. Eki bólmeli, ishi árlengen baspana kiltin alǵan jerlesimiz kózine jas alyp, qıyn jaǵdaıda kómektesken barshaǵa alǵysyn jetkizdi.
Eske salaıyq, kúni keshe oblys ákimi Ashat Shaharov qordyń dırektory Marat Aıtmaǵambetovpen birge Aqtóbe qalasynda baspanasy qalpyna keltirýge kelmeıtin 44 otbasyǵa páter kiltterin tabystady.
Bolat Ótemuratov qory baspanasyz qalǵan aqtóbelikterge jaqyn arada taǵy 56 páter satyp alýdy josparlap otyr. Sonymen qatar, tamyz aıynda Qobda aýdanynda tapsyrylady dep josparlanǵan shamamen 150 úıdiń qurylysy qarqyndy. Qor 2024 jyldyń qyrkúıegine deıin Aqtóbe aımaǵyndaǵy 400-den astam otbasyn baspanamen qamtýdy josparlap otyr.
Jalpy, oblysta 517 úı salynýda. 300-ge jýyq otbasy ekinshi naryqtaǵy, daıyn úıge kóship bardy.
Eske sala keteıik, buǵan deıin Oral qalasynda sý tasqynan zardap shekken turǵyndar úshin 450 jeke úı salynatynyn habarlaǵan bolatynbyz.
