Aqtóbe oblysynda 300-den astam kásipkerdiń quqyǵy qorǵaldy — prokýratýra

AQTÓBE. KAZINFORM — Bıyl Aqtóbe oblysynyń prokýratýrasy kásipkerlerdiń quqyqtaryn qorǵaý baǵytynda 300-den astam naqty fakti boıynsha shara qabyldady. 

Tekserý barysynda bızneske zańsyz aralasýdyń 6 deregi anyqtalǵan. Sonyń biri – «Aqtóbe» áleýmettik-kásipkerlik korporatsııasynyń ındýstrııalyq aımaǵynda jumys isteıtin 17 ınvestor elektr energııasyn zańdy tulǵalarǵa arnalǵan joǵary tarıfpen tutynyp, negizsiz artyq tólem jasap kelgen.

Prokýratýranyń aralasýymen olardyń tarıfi 49,99 teńgeden 38,86 teńgege deıin, ıaǵnı 11 teńgege tómendetildi.

Taǵy bir mysal, prokýrordyń apellıatsııalyq ótinishi negizinde «Tehnoservıs» JShS-niń paıdasyna sot sheshimimen 100 mln teńgeden astam qarajat óndirildi. Kompanııa káriz júıelerine tehnıkalyq qyzmet kórsetkenimen, tapsyrys berýshi oryndalǵan jumys úshin tólem jasaýdan bas tartqan.

- Barlyq derekter boıynsha prokýrorlyq qadaǵalaý aktileri engizilip, kásipkerlerdiń quqyqtary qalpyna keltirildi. Memlekettik organdardyń jaýapty tulǵalary tártiptik jáne ákimshilik jaýapkershilikke tartyldy. Birqatar laýazymdy tulǵa ÁQBtK-niń 173-baby boıynsha jaýap berdi, - dep jazdy baqylaýshy organnan.

Aıta keteıik, Aqtóbe oblysynda 77 júk kóligin zańsyz tirkegen uıymdasqan top ustaldy.