Aqtóbe oblysynda 1,2 mlrd teńge salyq tólenbegen: úsh qyzmetker jazalandy
ASTANA. KAZINFORM – Aqtóbe oblysynda jer qoınaýyn paıdalanýshylardyń 1,2 mlrd teńgeden astam salyq mindettemesin oryndamaǵany anyqtaldy, dep habarlaıdy oblystyq prokýratýra.
Aqtóbe oblysynyń tabıǵatty qorǵaý prokýratýrasy júrgizgen tekserý barysynda jer qoınaýyn paıdalaný salasyndaǵy salyq zańnamasynyń buzylǵany belgili boldy.
Atap aıtqanda, 2022-2025 jyldar aralyǵynda jasalǵan 127 kelisimshart boıynsha jer qoınaýy ýchaskelerin paıdalanýǵa qatysty salyq mindettemeleri tolyq oryndalmaǵan.
– Búgingi kúni prokýrorlyq den qoıý sharalary boıynsha 600 mıllıonnan astam teńge óteldi. Sonymen qatar 29 kompanııa jalpy somasy 250 mıllıon teńgege qosymsha salyq deklaratsııasyn óz erkimen tapsyrdy, – dep habarlady prokýratýra.
Qazirgi ýaqytta qalǵan salyq bereshegin tolyq óndirip alý baǵytynda jumystar júrgizilip jatyr.
Sonymen qatar prokýrorlyq tekserý nátıjesinde qyzmettik mindetterin tıisinshe oryndamaǵan salyq organdarynyń úsh qyzmetkeri tártiptik jaýapkershilikke tartyldy.
Aıta keteıik, buǵan deıin Soltústik Qazaqstan oblysynda jer qoınaýyn paıdalanýshylardyń salyq mindettemelerin oryndamaǵany anyqtalǵan edi. Prokýratýranyń aralasýymen memleket paıdasyna 18 mln teńge óndirildi.
