Aqtóbe oblysynda 12 myńǵa jýyq adam senbilikke shyǵyp, 7 200 aǵash otyrǵyzdy
AQTÓBE. KAZINFORM – Aqtóbe oblysynda Dúnıejúzilik tazalyq kúni – World Cleanup Day aıasynda ótken senbilikke 12 myńǵa jýyq adam qatysyp, óńir boıynsha 7 200 túp aǵash otyrǵyzyldy, dep habarlaıdy Aqtóbe oblysy ákiminiń baspasóz qyzmeti.
«Taza Qazaqstan» jalpyulttyq ekologııalyq bastamasy aıasyndaǵy tazalyq jáne kógaldandyrý jumystary Aqtóbe qalasy men oblystyń barlyq aýdanynda uıymdastyryldy. Oǵan belsendiler, eriktiler, óner salasynyń ókilderi, memlekettik organdar, uıymdar men kásiporyndardyń qyzmetkerleri jáne turǵyndar qatysty.
Aqtóbe oblysynyń ákimi Ashat Shaharov «Qonys» sport saraıynyń janyndaǵy jańa saıabaq aýmaǵynda aǵash otyrǵyzdy.
– Baǵdarlamanyń máni tek kóshelerdi tazalaýmen shektelmeıdi. Bul – adamnyń qorshaǵan ortaǵa degen kózqarasyn ózgertý, ekologııalyq mádenıetti qalyptastyrý jáne árbir azamattyń óz qalasyna, aýylyna, kóshesine degen jaýapkershiligin arttyrý, – dedi Ashat Shaharov.
Senbilik barysynda oblys boıynsha 7 200 túp aǵash otyrǵyzyldy. Olardyń arasynda moıyl, sheten, shaǵan, qaraǵaı, sıren, tal, úıeńki, jemis aǵashtary jáne basqa da ósimdik túrleri bar.
Jabyq tamyr júıesi bar kóshetterdiń bıiktigi shamamen 2-4 metr. Mamandardyń aıtýynsha, olar agrotehnıkalyq talaptarǵa jáne qazirgi aýa raıyna saı otyrǵyzylǵan. Bul aǵashtardyń jersiný múmkindigin arttyrady.
Óńirde jasyl jelekti kóbeıtý jumystary da jalǵasyp jatyr. 2026 jyly Aqtóbe qalasy men aýdan ortalyqtarynda jalpy aýmaǵy 135 gektar jasyl beldeý qurý josparlanǵan. Qazirgi ýaqytta 46 gektar aýmaqqa 154 myńǵa jýyq túp aǵash otyrǵyzyldy. Josparlanǵan jumystar qarasha aıyna deıin aıaqtalýǵa tıis.
Sonymen qatar oblysta 12 qyrkúıek pen 14 qarasha aralyǵynda eki aılyq senbilik ótip jatyr.
