Aqtóbe oblysyna halyqaralyq ınvestıtsııalyq deńgeıdegi reıtıng berildi
ASTANA. KAZINFORM – Halyqaralyq reıtıngtik agenttik Fitch Ratings Aqtóbe oblysyna «BBB-» deńgeıinde turaqty boljammen uzaqmerzimdi halyqaralyq kredıttik reıtıng jáne «AA+(kaz)» deńgeıinde uzaqmerzimdi ulttyq reıtıng berdi.
«BBB-» reıtıngi Fitch halyqaralyq shkalasy boıynsha ınvestıtsııalyq deńgeıge sáıkes keledi jáne óńirdiń qarjylyq mindettemelerin ýaqytyly ári tolyq kólemde oryndaý qabiletin kórsetedi. Al «AA+(kaz)» ulttyq reıtıngi oblystyń qazaqstandyq emıtentter arasyndaǵy joǵary kredıttik qabilettiligin aıǵaqtaıdy.
Aqtóbe oblysy ónerkásiptik, tabıǵı resýrstyq jáne ınvestıtsııalyq áleýeti joǵary óńirlerdiń biri sanalady. Ekonomıkanyń ártaraptandyrylǵan qurylymy men iri ınvestıtsııalyq jobalardyń júzege asyrylýy óńirdiń turaqty áleýmettik-ekonomıkalyq damýyna negiz bolyp otyr.
«Fitch halyqaralyq reıtıngi – óńirdiń qarjylyq turaqtylyǵyna berilgen táýelsiz baǵa jáne Aqtóbe oblysynyń ekonomıkalyq áleýetine degen senimniń aıqyn kórinisi. Bul biz úshin atqarylǵan jumystyń nátıjesi ǵana emes, sonymen qatar ınvestıtsııa tartýǵa, jańa jobalardy iske asyrýǵa jáne óńirdiń básekege qabilettiligin odan ári arttyrýǵa qosymsha múmkindik. Basty mindet – osy áleýetti ekonomıkanyń turaqty damýy men turǵyndardyń ómir súrý sapasyn jaqsartý jolynda tıimdi paıdalaný», – dedi Aqtóbe oblysynyń ákimi Ashat Shaharov.
Oblys ákimdiginiń málimetinshe, halyqaralyq kredıttik reıtıngtiń berilýi óńir ınfraqurylymyn damytý úshin bıýdjetten tys qarjylandyrý kózderin tartý múmkindigin keńeıtedi.
Sondaı-aq bul jańa jumys oryndaryn ashýǵa, kásipkerlikti damytýǵa, kommýnaldyq ınfraqurylymdy jańǵyrtýǵa jáne áleýmettik mańyzy bar nysandardy salý men qaıta jańǵyrtýǵa oń áser etýi múmkin.
Aıta keteıik, Aqtóbede qala ishindegi marshrýttardy sýbsıdııalaýǵa 10 mlrd teńge jumsalady.
