Aqtóbe oblysy Ulttyq statıstıka bıýrosynyń departamentine jańa basshy keldi

ASTANA. KAZINFORM — Aıbek Ǵalymjanov rotatsııa tártibimen Ulttyq statıstıka bıýrosynyń Aqtóbe oblysy boıynsha departamentiniń basshysy bolyp taǵaıyndaldy, dep habarlaıdy SJRA Ulttyq statıstıka bıýrosy.

Burynǵy basshy Joldasqalı Beıisov zeınet jasyna jetýine baılanysty qyzmetinen bosatyldy.

Jańa basshyny ujymǵa QR SJRA Ulttyq statıstıka bıýrosy basshysynyń orynbasary Ásel Shaýenova tanystyrdy.

Aıbek Ǵalymjanov Qazaq kólik jáne kommýnıkatsııa akademııasyn «Kólik kásiporyndaryndaǵy ekonomıka jáne menedjment» mamandyǵy boıynsha bitirgen.

Statıstıka salasynda eńbek jolyn 2002 jyly Qostanaı oblysynyń Jangeldi aýdandyq statıstıka bóliminiń bastyǵy bolyp bastaǵan.

2005-2012 jyldary Qostanaı oblysynyń Statıstıka esepteý ortalyǵynyń dırektory qyzmetin atqardy.

2012-2015 jyldary Qamysty aýdany (Qamysty aýyly) ákimdigi apparaty men Qostanaı qalasy ákimdiginde ártúrli laýazymdarda jumys istedi.

2015-2019 jyldary QR QM MMJK Qostanaı memlekettik múlik jáne jekeshelendirý departamentinde bólim basshysy, basshy qyzmetterin atqardy.

2019 jylǵy qarashadan bastap jańa taǵaıyndaýǵa deıin Ulttyq statıstıka bıýrosynyń Qostanaı oblysy boıynsha departamentiniń basshysy laýazymynda boldy.

«Qurmet» ordenimen jáne «Birinshi ulttyq aýyl sharýashylyǵy sanaǵy» jáne «Statıstıka úzdigi» tósbelgilerimen marapattalǵan.

Budan buryn Qazaqstanda apta ishinde bolǵan kadrlyq taǵaıyndaýlarǵa sholý jasaǵan edik.