Aqtóbe oblysy prokýratýrasy bıýdjetke 1 mlrd teńgeden astam qarajatty qaıtardy
AQTÓBE. KAZINFORM – 2025 jyly Aqtóbe oblysynyń prokýratýrasy memleket kirisine 1 mlrd teńgeden astam qarajattyń qaıtarylýyn qamtamasyz etti.
Vedomstvo málimetinshe, qarajat memlekettik satyp alý sharttary boıynsha qamtamasyz etý men turaqsyzdyq aıybyn óndirý, memlekettik kelisimsharttar aıasyndaǵy kepildik mindettemelerdi oryndaý, sondaı-aq salyq bereshekterin óteý esebinen bıýdjetke qaıtarylǵan.
Prokýratýra keltirgen mysalǵa sáıkes, oblystyq qurylys basqarmasy men «MIR-A Construction» JShS arasynda Baıǵanın aýdanynyń Mataı aýylynda modýldik úlgidegi ǵımarattardan turatyn oqý-jattyǵý bazasyn salý týraly kelisimshart jasalǵan. Osy shart boıynsha merdigerge 288 mln teńge kóleminde avanstyq tólem aýdarylǵan.
Alaıda shart keıin birjaqty tártippen buzylǵanymen, avans somasy bir jyldan astam ýaqyt boıy qaıtarylmaǵan. Prokýrorlyq qadaǵalaý sharalary nátıjesinde bul qarajat tolyq kólemde óndirilip, memleket kirisine tústi.
Prokýratýra atalǵan baǵyttaǵy jumystyń jalǵasatynyn jáne turaqty baqylaýda turǵanyn atap ótti.
Aıta keteıik, Aqtóbe oblysynda memleketke 180 mln teńge zalal keltirgen aqtóbelik sottaldy.