Aqtóbe oblysy Oıyl aýdanynyń ákimi taǵaıyndaldy
AQTÓBE. KAZINFORM — Oıyl aýdany ákimi qyzmetin endi Sáken Zaımoldın atqarady. Ol buǵan deıin aýdandyq máslıhattyń tóraǵasy boldy.
QR Prezıdenti ákimshiliginiń jáne Oıyl aýdandyq máslıhaty depýtattarynyń kelisimimen Oıyl aýdanynyń ákimi qyzmetine Sáken Zaımoldın taǵaıyndaldy.
Ol osy aýyldyń týmasy. Q.Jubanov atyndaǵy Aqtóbe ýnıversıtetin «dene tárbıesi jáne bıologııa», Máskeý tehnologııalyq ınstıtýtyn «menedjment» mamandyqtary boıynsha támamdaǵan.
Eńbek jolyn 1997 jyly Oıyl kásiptik-tehnıkalyq lıtseıinde bastaǵan. Oıyl agrarlyq kolledjinde jumys istedi. Qaraoı aýyldyq okrýginiń ákimi, 2020-2021 jyldary «Nur Otan» partııasynyń Oıyl aýdandyq fılıaly tóraǵasynyń birinshi orynbasary boldy. 2021 jyldan osy ýaqytqa deıin Oıyl aýdandyq máslıhatynyń hatshysy, tóraǵasy qyzmetin atqaryp keldi.
— 2026 jylǵy qańtar-shilde aılarynyń qorytyndysy boıynsha aýdanda negizgi áleýmettik-ekonomıkalyq kórsetkishterdiń basym bóliginde ósim baıqalady. Atap aıtqanda, ınvestıtsııa kóleminiń ındeksi 107%, aýyl sharýashylyǵy — 102%, qurylys jumystary — 163,1%, turǵyn úıdi paıdalanýǵa berý — 102,8%, ónerkásip óndirisi 110% qurady. Aýdannyń oblys ortalyǵynan shalǵaı ornalasýyna baılanysty azyq-túlik qaýipsizdigin qamtamasyz etetin óndiristerdi damytýǵa basymdyq berý qajet. Atap aıtqanda, qus, ósimdik sharýashylyǵy jáne aýyl sharýashylyǵy ónimderin qaıta óńdeý baǵyttaryn keńeıtý kózdelip otyr. Qazirgi tańda aýdanda bir ǵana jylyjaı jumys isteıdi. Oblys ákimi Oıyldyń týrıstik áleýetin arttyrý qajettigin de atap ótti. Aýdannyń tabıǵı erekshelikteri men tarıhı-mádenı murasy ekologııalyq jáne mádenı-tarıhı týrızmdi damytýǵa múmkindik beredi, — dep habarlady Aqtóbe oblysy ákiminiń baspasóz qyzmeti.
Aıta keteıik, buǵan deıin Almatynyń Jetisý aýdanyna jańa ákim taǵaıyndalǵan edi.
