Aqtóbe oblysy Keńes Odaǵynyń Batyry Imanǵalı Biltabanovtyń 100 jyldyǵyn atap ótti
AQTÓBE. KAZINFORM — Qobda aýdanynda Jeńistiń 80 jáne Keńes Odaǵynyń Batyry Imanǵalı Biltabanovtyń 100 jyldyǵyna oraı patrıottyq jáne sporttyq is-sharalar ótti. Batyrdyń rýhyna taǵzym etilip, erlikteri nasıhattaldy.
Sharaǵa jınalǵandar Qobda aýylyndaǵy «Máńgilik el» saıabaǵynda Imanǵalı Biltabanovty bir mınýt únsizdikpen eske alyp, gúl shoqtaryn qoıdy. Aýdan ákimi Іzgilik Tynymgereev, batyrdyń inisi Zulqarnaı Bashpaev, zııaly qaýym ókilderi sóz sóılep, batyrdyń erlik jolyn dáripteý kerektigin tilge tıek etti.
— Búgin biz barsha qazaq halqy úshin maqtanysh, elimizdiń qaharman uly, Keńes Odaǵynyń Batyry Imanǵalı Biltabanovtyń 100 jyldyǵyn atap ótý úshin jınalyp otyrmyz. Bul kún — ótkenniń jarqyn kórinisi, erliktiń belgisi, Otan úshin janyn bergen azamattyń esimin ulyqtaý kúni. Imanǵalı Biltabanov — barshamyz úshin úlgi tutar tulǵa. Ol Uly Otan soǵysynyń aldyńǵy shebinde jaýmen betpe-bet kezdesip, Otanyna degen sheksiz mahabbatymen erlik kórsetti. Onyń erligi — bizge, keıingi urpaqqa zor jaýapkershilik júkteıdi jáne bul erlikteri eshqashan umytylmaýy tıis. Sebebi bul Uly Otan jolyndaǵy ǵıbratty ǵumyr, — dedi aýdan ákimi.
Іs-sharalar batyr babamyzdyń erlik jolyn dáriptep, jas urpaqtyń boıyna otansúıgishtik qasıetterin qalyptastyrý maqsatynda uıymdastyryldy. Aýdannyń qurmetti azamattary Málik Jekeev pen Qajymuqan Satenov tarıhqa kóz júgirtip, batyrdyń erlik isterin baıan etti. Imanǵalı Biltabanovtyń óshpes erligin keıingi urpaqqa nasıhattaýdyń mańyzdylyǵyna toqtaldy.
— Búgingi shara tek eske alý ǵana emes, óskeleń urpaqqa ónege bolatyn, jadynda qalatyn, patrıottyq rýhqa tárbıeleıtin bastama dep bilemin. Ótkenin umytqan eldiń bolashaǵy bulyńǵyr. Biz jastarymyzdy patrıottyq rýhta tárbıelemesek, eldigimizge syn. Al rýhy bıik eldiń árdaıym eńsesi bıik bolady. Jastardy óz tarıhyn bilýge, arda týǵan jurtyna adal qyzmet etýge baýlý — bizdiń paryzymyz. Jastar tarıhyn bilip, elin súıýi kerek, babalar jolyn jalǵap, elge qyzmet etýge umtylýy tıis, — dedi eńbek ardageri Serik Botaǵarın.
Aýdandyq dene shynyqtyrý jáne saýyqtyrý kesheninde «Erligimen el esinde» atty kolledjder arasynda oblystyq voleıbol jarysy men fýtboldan aýdandyq jarystyń ashylý saltanaty ótti. Sporttyq dodalarǵa Aqtóbe qalasynan, Oıyl jáne Qobda aýdandarynan kelgen 18-35 jas aralyǵyndaǵy jastar qatysty.
Aıta keteıik, birqatar shara batyrdyń týǵan aýylynda da uıymdastyryldy. Jınalǵandar batyrdyń esimi berilgen I.Biltabanov aýylyna baryp, «Rýhty urpaq» atty sporttyq-patrıottyq sharanyń kýási boldy. Mektep aýlasynda «Erligi elge maqtan» atty eske alý sharasy uıymdastyrylyp, batyrdyń erlik isteri nasıhattaldy. Aýyldyq klýbta ótken «Dańq joly» kórmesinde atalas inisi Ysqaqqa batyrdyń óz qolymen jazǵan hatynyń jáne komandır ıÝjakovtyń marapatynyń kóshirmesi usynyldy. Batyrdyń maıdan dalasyndaǵy erligi jóninde maǵlumat berildi.
Imanǵalı Biltabanovtyń 100 jyldyǵyna oraı uıymdastyrylǵan shara «Batyrlar eliniń qaıtpas qyrany» atty kontserttik baǵdarlamamen aıaqtaldy. Mektep oqýshylary men jastar patrıottyq án shyrqap, ónerlerin ortaǵa saldy. Maıdanda oq pen ot keshken batyrlardyń erligi dáriptelip, esimderi ulyqtaldy.