Aqtóbe oblysy Qazaqstanda jaıylymdyq jer kólemi boıynsha birinshi orynda
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın Aqtóbe oblysyna jumys sapary aıasynda óńirdiń sharýalarymen kezdesti, dep habarlaıdy Ulttyq ekonomıka mınıstrliginiń baspasóz qyzmeti.
Kezdesýge keńeıtilgen formatta onlaın baılanys arqyly aýdandardaǵy sharýa qojalyqtarynyń basshylary da qatysty. Oblys ákimi Ashat Shaharov óńir aýyl sharýashylyǵynyń negizgi baǵyty mal sharýashylyǵy bolyp qala beretinin atap ótti. Bul rette Áıteke bı, Qarǵaly, Hromtaý jáne Mártók aýdandarynda egin sharýashylyǵy da qarqyndy damyp keledi.
2025 jyldyń qorytyndysy boıynsha oblysta aýyl sharýashylyǵy óniminiń kólemi 412 mlrd teńgeni qurap, byltyrǵy jylmen salystyrǵanda 2,5%-ǵa ósti. 2026-2028 jyldary óńirdiń agroónerkásip kesheninde jalpy somasy 94,9 mlrd teńgeni quraıtyn 11 ınvestıtsııalyq jobany júzege asyrý josparlanýda, onyń ishinde 4 joba bıyl iske qosylady. Olardyń qatarynda «Jannur» ShQ men «Agroproduct development» JShS-nyń bordaqylaý alańdaryn salý jáne keńeıtý, «Ramazan qus» JShS-nyń qus fabrıkasyn iske qosý, sondaı-aq «AIS» JShS-nyń sút-taýar fermasyn ashý bar.
2025 jyly óńirde 554 myń tonna dándi daqyl jáne 72,4 myń tonna maıly daqyl jınaldy. Sondaı-aq kókónisten, sonyń ishinde kartoptan mol ónim alyndy. Egis alqaptaryn ártaraptandyrý aıasynda maıly jáne mal azyqtyq daqyldardyń kólemi ulǵaıtyldy.
Kezdesý barysynda aýyl sharýashylyǵy vıtse-mınıstri Amanǵalı Berdalın qatysýshylardy mal sharýashylyǵyn damytý jónindegi jańa Keshendi jospardyń negizgi parametrleri týraly habardar etti.
Talqylaý kezinde sharýalar birqatar másele kóterdi. Atap aıtqanda, Qazaqstan fermerleri qaýymdastysynyń oblystyq fılıalynyń jetekshisi Qusaıyn Sársembaı «Igilik», «Bereke» jáne «Jaılaý» baǵdarlamalary boıynsha «Damý» kásipkerlikti damytý qory arqyly kepildik berý múmkindigin qarastyrýdy usyndy.
Serik Jumanǵarın qazirgi ýaqytta osy baǵdarlamalar boıynsha «Damý» qory arqyly kepildikter berý tetigi pysyqtalyp jatqanyn aıtty. Bul quraldy engizý jónindegi aldyn ala kelisimge qol jetkizilgen, alaıda jekelegen sharttar men tehnıkalyq parametrler áli de kelisý satysynda.
Sonymen qatar nesıe men lızıng boıynsha paıyzdyq mólsherlemelerdi sýbsıdııalaýdyń qoljetimdiligi máselesi kóterildi. «Aıs plıýs» JShS dırektory Qýanysh Işanov bıýdjet qarajatynyń joqtyǵyna baılanysty portal jumysy toqtatylǵanyn, sondyqtan ótinim berý múmkin emestigin málimdedi.
Sondaı-aq óńirdegi «Stepnoe» JShS, «Qumqudyq» JShS, «Prıgorodnoe» JShS jáne «Meńdibaı-Qaraǵash» ShQ ókilderi de óz suraqtaryn qoıdy. Barlyq kóterilgen másele boıynsha jıyn barysynda tıisti túsindirmeler berildi.
Kezdesý qorytyndysynda vıtse-premer Aqtóbe oblysy 25,3 mln gektar jaıylymdyq jeri bar elimizdegi eń iri óńir ekenin atap ótti. Memleket sharýalarǵa qoldaý kórsetýdi jalǵastyrady, sonymen qatar qarsy talaptar da kúsheıtilýde. Onyń negizgisi — aýyl sharýashylyǵy jerlerin tıimdi paıdalaný. Osy baǵytta jerdi paıdalanýdyń tıimdilik kórsetkishterin engizý, sondaı-aq egin sharýashylyǵymen aınalysatyn sharýashylyqtardyń mal sharýashylyǵyn da qatar alyp júrý múmkindikteri qarastyrylýyp jatyr.
Sol kúni Serik Jumanǵarın bıýdjet máseleleri boıynsha bólek jıyn ótkizip, onda qarjylandyrýdyń negizgi parametrleri men shyǵystardyń basym baǵyttary qarastyrdy. Talqylaý qorytyndysy boıynsha bıýdjet qarajatyn tıimdi paıdalaný jáne onyń ıgerilýine baqylaýdy kúsheıtý jóninde tapsyrmalar berildi.
Jumys sapary aıasynda mınıstr «KAZFELTEC» JShS-niń jún óńdeý zaýytynyń jumysymen de tanysty.
Kásiporyn ıtalııalyq tehnologııalardy paıdalanyp, tabıǵı qoı júninen jylý jáne dybys oqshaýlaǵysh materıaldar óndirýge mamandanǵan.
Osydan buryn Serik Jumanǵarın bıyl bızneske qysym jasamastan 4 trln teńge salyq túsirý kerek ekenin aıtty.
