Aqtóbe oblysy aýmaǵyndaǵy orman sharýashylyqtaryna jańa tehnıkalar tabystaldy
AQTÓBE. KAZINFORM — Arnaıy tehnıkanyń kiltin tabystaý rásimi Naýryznama onkúndigi qorytyndylanǵan «Tazarý» kúni aıasynda ótti, dep habarlaıdy Aqtóbe oblysy ákimdiginiń baspasóz qyzmeti.
Oblys ákimi Ashat Shaharov bul kúnniń tabıǵatqa janashyrlyq pen qorshaǵan ortanyń tazalyǵyna degen qamqorlyqty bildiretinin alǵa tartty. Sondaı-aq, orman sharýashylyǵy qyzmetkerleri men salalyq mekemelerdiń eńbegi qoǵamda ekologııalyq mádenıetti qalyptastyrýda mańyzdy ról atqaratynyn jetkizdi.
Óńir basshysy orman sharýashylyǵynyń materıaldyq-tehnıkalyq bazasyn nyǵaıtýdyń qajettiligine de toqtaldy. Onyń sózinshe, tabıǵı baılyqtardy saqtaý jáne ony keler urpaqqa jetkizý — óńirdiń árbir turǵynyna ortaq mindet.
— Memleket basshysynyń tapsyrmasyna sáıkes óńirde „Taza Qazaqstan“ ekologııalyq aktsııasy júzege asyrylýda. Onyń aıasynda orman qoryn ulǵaıtý, aýmaqtardy abattandyrý jáne salanyń materıaldyq-tehnıkalyq bazasyn nyǵaıtý boıynsha keshendi jumystar júrgizilýde. 2021-2027 jyldary oblysta 64 mıllıonnan astam aǵash otyrǵyzý josparlanǵan. Byltyr 18,6 mıllıon kóshet otyrǵyzylsa, bıyl taǵy shamamen 10 mıllıon aǵash egý kózdelip otyr. Sonymen qatar, tek otyrǵyzý ǵana emes, orman resýrstaryn saqtaý máselesine de basa nazar aýdarylady. Búgin tabystalǵan tehnıka ormandardy qorǵaýdyń tıimdiligin arttyrýǵa, órt oshaqtaryna jedel áreket etýge, qoljetimsiz aýmaqtarda jumys isteýge, sondaı-aq gıdrotehnıkalyq nysandardy kútip ustaýǵa jáne sý tasqynynyń aldyn alýǵa múmkindik beredi. Sońǵy jyldary salany damytýǵa 2,2 mıllıard teńgeden astam qarjy baǵyttaldy jáne bul jumys aldaǵy ýaqytta da jalǵasady, — dedi oblys ákimi.
Traktorlar, shaǵyn orman patrýldik órt sóndirý keshenderi, júk-jolaýshylar avtokólikteri, frontaldy tıegishter, shynjyrtaban ekskavator, aýyr tehnıka tasymaldaıtyn tirkeme — bul tehnıkalar orman qoryn qorǵaýǵa arnalǵan jáne qoljetimsiz aýmaqtarda jumys isteý men tótenshe jaǵdaılardy joıý barysynda salalyq qyzmetterdiń múmkindigin edáýir arttyrady.
Atalǵan tehnıkalar Aqtóbe oblystyq orman jáne janýarlar dúnıesin qorǵaý mekemesine, sondaı-aq Áıteke bı, Baıǵanın, Qobda, Mártók, Muǵaljar, Temir, Oıyl, Shalqar aýdandarynyń orman sharýashylyqtaryna jáne óńirdiń gıdrotehnıkalyq qurylystardy paıdalaný mekemesine tabystaldy.
Aqtóbe orman sharýashylyǵynyń orman sheberi ıÝrıı Shtanko bul salada 26 jyldan beri eńbek etip keledi. Onyń aıtýynsha, mundaı aýqymdy tehnıka parki buryn-sońdy bolmaǵan. Jańa tehnıkanyń arqasynda mamandar qoljetimsiz aýmaqtarǵa jyldamyraq jetip, órtti tıimdi sóndire alady.
— Meniń tájirıbemde mundaı avtoparktiń tolyqtyrylýy alǵash ret. Bizge úsh keshen, eki traktor, adamdardy tasymaldaýǵa arnalǵan «Ýral» kóligi berildi. Men Qarǵaly aýdanynda turamyn, bıik jerler kóp. Órt qaýpi jıi týyndaıdy. Osy tehnıkamen órt oshaqtaryna jetý áldeqaıda jeńil bolady. Onyń ishinde motopompa, arqalyq órt sóndirgishter, soqqyshtar, balta, kúrek sııaqty barlyq qajetti quraldar bar. Bul — orman sharýashylyǵyna úlken kómek, — deıdi ıÝrıı Shtanko.
Orman sharýashylyǵy ókilderi jańa tehnıkalar kúndelikti jumysty aıtarlyqtaı jeńildetip, óńirdiń ekologııalyq qaýipsizdigin arttyrýǵa jáne bolashaq urpaq úshin jasyl qordy saqtaýǵa mańyzdy úles qosatynyna senimdi.
