Aqtóbe oblysy aqtútek boranmen qalaı kúresti
AQTÓBE. KAZINFORM – Aqtóbede 7 aqpan kúni bolǵan boran myńdaǵan abonentti sýsyz, jaryqsyz qaldyrdy. Oqýshylar úsh kún boıy sabaqty onlaın oqydy. Aýdan, aýyldarda qatynas úzildi. Qazir oblys ortalyǵynda jaryq, sý máselesi sheshildi. Al keıbir aýyldarda áli de jaryq joq. Úsh kúnde ne boldy? Tyryǵyqtan shyǵar jol qaısy?
Birinshi kún
Aqtóbelik sınoptıkter kúni buryn jeldiń jyldamdyǵy sekýndyna 30 meterge deıin jetedi dep boljam jasap, habar taratty. Tótenshe jaǵdaılar qyzmeti túgel habar alǵanymen, uıytqyp soqqan jel kópti ábigerge túsirdi.
7 aqpan kúni joldar jabylyp, tańda balalardyń sabaqty onlaın oqıtyny belgili boldy. Tek mektep oqýshylary ǵana emes, kolledj bilim alýshylary da qashyqtan bilim aldy. Bul qaýipsizdiktiń alǵashqy sharalary.
Keıin 6 aqpannan 7-ine qaraǵan túni bes qabatty úılerdiń shatyry ushty. Bul turǵyn úılerdiń kóbi jańadan salynǵan.
Sonymen birge qala mańyndaǵy 7 turǵan alapqa qatynaıtyn qoǵamdyq kólikter toqtatyldy. Sebebi kórý qashyqtyǵy tym tómen ári jol da joq. Polıtsııanyń osy sheshiminen soń Aqtóbe qalasyna jaqyn turǵan eldimekenderdiń halqy jumysqa barmady. Sonymen birge qala mańyndaǵy oblystyq aýrýhana dárigerleri de áriptesterin almastyra almaı, biraz ýaqyt kútýge týraly keldi. Sársenbidegi boran kezinde áýejaı qyzmetine de shekteý qoıyldy. Ushyp, qoný alańy ushaqtardy qabyldamaı, reıster keıinge shegerildi.
Mundaı jaǵdaıda birden shuǵyl jeli iske qosylyp, adamdar jolda qalǵan týystary men tanystaryn izdedi. Kóp uzamaı óńirdegi qutqarýshylar jylytý beketterine júrgizýshiler men jolaýshylardy jetkizdi.
Aqpannyń 6-y kúni Aqtóbe oblysynyń ákimi áleýmettik jelidegi paraqshasynda barlyǵy 20-dan astam aýyldyń jaryqsyz qalǵanyn málimdep, kópshilikti sabyrǵa shaqyrdy.
Ekinshi kún
Aqtóbe óńirlik kommýnıkatsııalar qyzmetinde tótenshe jaǵdaılar kezinde damylsyz jumys istegen kommýnaldyq qyzmet mekemeleriniń basshylary men qala ákimi Azamat Beket brıfıng ótkizdi. Sebebi qalada sol kúni 5 turǵyn úıdiń shatyry ushyp ketti. Kelisim boıynsha tórt úıdi qurylys kompanııasy qalpyna keltirýge ýáde etse, bireýi turǵandardyń óz mindetinde boldy. Azamat Beket tek tehnıka bólýdi jón dep tapty.
8 aqpan kúni Aqtóbede áýejaıdyń ushý-qoný alańy jumys istemedi. Sonymen birge balalar da sabaqty onlaın jalǵastyrdy. Tek mektep emes, kolledj bilim alýshylary, ýnıversıtet stýdentteri qashyqtan oqydy.
Mamandar bul eki kúnde de sý, jaryq berý máselesin sheshý úshin qyzmetkerlerdiń damylsyz eńbek etkenin aıtty. Alaıda 2-3 táýlik boıy elektr togynan ajyratylǵan turǵyndardyń shaǵymy kóbeıip, jaryqsyz qalǵandardyń sany arta tústi. Ony jóndeýdiń óz qıyndyǵy bar. Birinshiden elektr jóndeýshiler dittegen jerge boran saldarynan jete almady, ekinshiden, aqaýdy dál tabý ýaqyt aldy.
Aýdandarda mektepterdegi sport, májilis zaldarynyń shatyry ushyp, qasbetteri búlindi. Sol sebepti Áıteke bı jáne Hromtaý aýdandarynda jergilikti jaǵdaıdaǵy tótenshe jaǵdaı jarııalandy. Aıta keteıik, eki aýdan da shyǵynnyń qansha ekenin áli ataı almady.
Boryndy kúni tanylǵan «batyrlar»
Aqtóbedegi áleýmettik jeliden túrli shaǵymmen qatar alǵysty da kóp kórýge bolady. Eki oqıǵa elimizdiń barlyq turǵynyn tánti etti. Biri - 18 shaqyrym boıy júrip, keıde júgirip ótken tótenshe jaǵdaılar qyzmetkerleriniń eńbegi. Olar Muǵaljar aýdany Qandyaǵash qalasynnan Basshıli aýylyna deıin «Trekol» jol talǵamaıtyn kóligimen bardy. 73 jastaǵy qarııany aýdan ortalyǵyndaǵy aýrýhanaǵa jetkizý úshin №8 órt sóndirý bóliminiń 8 qyzmetkeri kólik aldyna alma-kezek shyǵyp júrdi, keıde júgirdi. Sóıtip ári-beri 36 shaqyrymdy eńserip, qarııanyń aq batasyn aldy.
Al hromtaýlyq feldsherler shaqyrtýǵa keshigip jatqan sebebin vıdeoǵa túsirip, dıchpetcherge jiberdi, sóıtip bir-aq sátte búkil elge tanyldy. Júregi syr bergen naýqasqa barǵan olar jarty jolda kólikten túsip, jaıaý ombylaýǵa májbúr bolǵan. Osy sátti túsirip alǵan Saıa Rysbaı men onyń janyndaǵy eki feldsher búginde alǵysqa bólenip jatyr. Aldymen elimizdiń Densaýlyq saqtaý mınıstri Aqmaral Álnazarova alǵysyn bildirip, eńbegi eskerýmiz qalmaıtynyn aıtty. Sonymen birge Aqtóbe oblysynyń ákimi Ashat Shaharov marapattady.
Úshinshi kún
9 aqpan kúni Aqtóbe oblysynyń ákimi Ashat Shaharov óńirdegi jaǵdaıdy baǵamdap, túni boıy atqarylyp jatqan isterge toqtaldy. Sol sátte 50-den astam aýyldyń jaryqsyz qalǵanyn, onyń teń jartysynda elektr togy qaıta qosylǵanyn habarlady. Mundaı kúnderi sabyrly bolyp, aýyzbirshilik tanytýǵa shaqyrdy.
Bul kúni de mektep jáne kolledjde sabaq onlaın ótti. Al qoǵamdyq kólik tasymaly qalpyna keltirildi. Aqtóbe qalasyndaǵy turǵyn alaptaryna jaryq berilip, sý júıesi qalpyna keltirildi. Eki kúnde aýyz sýsyz otyrǵan kópqabatty úıdiń turǵyndary bolsa, ózge qajettilik úshin qar eritip, shydap baqty.
Sonymen birge áýejaı qyzmeti qalpyna keltirildi.
Búgin
Búgin, ıaǵnı, 10 aqpan kúni Samara-Shymkent tasjolynda tek jeńil kóliktiń bir baǵytta qozǵalýyna ruqsat berildi. Al bul jolda 3 myńǵa jýyq júk kóligi tur. Bul kólikter borandy kúni qar ustap qalyp, qatynasty eki ese qıyndatyp jibergen. Keıbir kólikterdiń júrgizýshisi izdestirildi.
Aqtóbe oblysynyń ákimi Ashat Shaharov Hromtaýǵa baǵyttalǵan joldaǵy jaǵdaıdy bilý úshin issaparǵa shyǵyp, júrgizýshilermen de kezdesti.
Aqtóbe oblystyq polıtsııa departamentiniń habarlaýynsha, qar tolyq arshylǵansha júk kólikteriniń júrýine ruqsat joq. Al «Energosıstema» JShS baspasóz qyzmetiniń habarlaýynsha, qazirgi ýaqytta 500-den astam abonent jaryqsyz otyr. Olar Hromtaý, Alǵa, Áıteke bı aýdanyndaryndaǵy aýyldar.
Aqtóbe oblysy ákiminiń baspasóz qyzmetiniń habarlaýynsha, qazirgi kezde borandy kúni óz qyzmetin adal atqarǵan sala mamandarynyń tizimi jasaqtalyp jatyr. Olardyń árqaısysy marapattalady.
