Aqtóbe oblysy ákiminiń nazaryna: Prokýror para alý isinde jeke qaýly shyǵarýdy surady

AQTÓBE. KAZINFORM — Shalqar aýdandyq sáýlet, qurylys jáne qala qurylysy bóliminiń basshysy Shuǵa Sádýaqasovaǵa qatysty is aıaqtalýǵa jaqyn. Prokýror sottalýshyny 7 jylǵa bas bostandyǵynan aıyrýdy surady.

— Shuǵa Sádýaqasovany QR Qylmystyq kodekstiń 366-baby 3-bóligi 1,4- tarmaqtarynda kózdelgen qylmysty jasaǵany úshin kináli dep tanyp, oǵan memlekettik qyzmette, sýdıa qyzmetin, jergilikti ózin-ózi basqarý organdarynda, memlekettik, kvazımemlekettik sekter sýbektilerinde laýazymdardy atqarýǵa ómir boıyna tyıym sala otyryp 7 jyl merzimge bas bostandyǵynan aıyrý jazasyn taǵaıyndaýdy suraımyn. Sonymen qatar sottalýshynyń jazasyn óteý ornyn qylmystyq atqarý júıesiniń ortasha qaýipsiz mekemesi dep bilgileýdi suraımyn. Sottalýshyǵa qoldanylǵan eshqaıda ketpeý jáne tıisti minez-qulyq bultartpaý sharasyn kúzetpen ustaý túrindegi bultartpaý sharasyna ózgertip, sot zalynan qamaýǵa alýdy suraımyn, — dedi prokýror.

Sonymen birge sottalýshydan jábirlenýshilerdiń ótemaqy qoryna 20 AEK mólsherinde, ıaǵnı 78 640 teńge májbúrlep óndirýdi surady. Al zattaı dáleldemelerdi, onyń ishinde Shuǵa Sádýaqasovanyń qurbysynyń esepshotyndaǵy 5 mln teńge ósimpulymen birge óndirilýi múmkin. 

— Sonymen birge Sh. Sádýaqasovanyń tergeý organdaryna óz erkimen usynǵan 6 500 000 teńge aqshany memleket menshigine qaldyrýdy, qalǵan 2 250 000 teńgeni sottalýshydan óndirýdi suraımyn. Aýdan ákiminiń qaramaǵynda eki qylmystyq is boldy. «Para alý» baby boıynsha eki memlekettik qyzmetshi jaýapqa tartyldy. Úshinshi qyzmetker jaýapqa tartylyp jatyr. Sondyqtan da Aqtóbe oblysynyń ákimdigine nazaryn aýdarý úshin jeke qaýly shyǵarýdy suraımyn, — dedi prokýror.

Eske salsaq Shalqar aýdany ákiminiń orynbasary Bekturǵan Zaırymbet pen turǵyn úı-kommýnaldyq sharýashylyǵy bóliminiń basshysy Altynbaı Berkimbaev 6 jylǵa bas bostandyǵynan aıyryldy. Ekeýi de alǵan aqshasyn keri qaıtarady. 

Aıtyp óteıik, Shuǵa Sádýaqasova eki merdigerden mıllıondap para alǵany úshin aıyptalyp jatyr. Biri sý jelilerin qaıta jańǵyrtý, ekinshisi turǵyn úıge ınjenerlik ınfraqurylym tartý jobalarynyń merdigeri. Biraq sottalýshynyń ózi sot otyrysynda aqshany ákimge bergenin aıtty.