Aqtóbe oblysy ákimdiginiń qyzmetkerleri erteń onlaın jumys isteýi múmkin
AQTÓBE. KAZINFORM - Oqıǵa ornynda oblys ákimi Ashat Shaharov júr. Ol erteń jumys qashyqtan uıymdastyrylýy múmkin ekenin aıtty.
Qazirgi ýaqytta ákimdik ǵımaraty shatyryndaǵy órt oqshaýlanyp, byqsyp jatyr. Aýmaq áli de tolyq qorshaýǵa alynyp, ortalyqtaǵy Ábilqaıyr han dańǵylynyń bir bóligi ýaqytsha jabyq tur.
- Jalpy aıtqanda ǵımaratqa eshqandaı qaýip joq. Saǵat 17:30-da jumys aıaqtalady ákimdikte. Jumys kúni bitken soń ákimdikte tek qaýipsizdik qyzmetkerleri bolady. Barlyq jerde kamera bar. Órt qoıý týraly aıtar bolsam, ol baıqalmaıdy. Tergeý komıssııasy bekitilip, qazir jumys istep jatyr. Boljam da aıta almaımyz. Buǵan deıin de órt sóndirý boıynsha ǵımarattyń sáıkestigin qarady árıne. Onyń aldynda eshqandaı másele bolmady. Men túni boıy osynda bolamyn. Tótenshe jaǵdaılar departamenti ruqsat berse, erteń qalypty jumys isteı beremiz. Ol týraly tańerteń belgili bolady. Talaı qıyndyqtan óttik. Eger sondaı bolsa, onlaın jumys isteıdi,- dedi Aqtóbe oblysynyń ákimi Ashat Shaharov.
Onyń aıtýynsha, ákimdikte qundy qaǵazdar bar. Biraq oblys ákimi oǵan qatysty aqparat taratpady.
Aqtóbe oblystyq PD baspasóz qyzmetiniń habarlaýynsha, oqıǵa ornyna polıtsııa men Ulttyq ulannyń 200 qyzmetkeri jumyldyryldy.
Eske salsaq, Aqtóbede ákimdik ǵımaratynyń aldyna jedel shtab quryldy. Órt saǵat shamamen saǵat 20:28-da boldy. Bir saǵattan soń oqshaýlandy.
