Aqtóbe: Myńnan astam az qamtylǵan otbasyǵa 50 mıllıon teńge shamasynda qarjylaı kómek kórsetildi

A.Dosjanova atyndaǵy konferets-zalynda ótken saltanatty sharaǵa oblys ákimi Berdibek Saparbaev, máslıhat depýtattary, qoǵamdyq keńes músheleri, aımaqtaǵy shaǵyn, orta jáne iri bıznes basshylary, ardagerler, etnomádenı birlestik músheleri jáne stýdentter qatysty.

Alǵashqy bolyp sahnaǵa «Nur Otan» partııasynyń «Jas Otan» jastar qanatynyń belsendi jastary shyqty. «Qazaqstan - 2050» jalpy ulttyq qozǵalysynyń Aqtóbe oblysy boıynsha ókili Erbol Shyma sóz sóılep, Elbasy Nursultan Nazarbaevqa  arnaǵan úndeýin joldady.

Sondaı-aq aktsııa barysynda múmkindigi shekteýli jáne az qamtylǵan otbasylarǵa, ata-ananyń qamqorlyǵynsyz qalǵan balalarǵa áleýmettik qoldaý kórsetý maqsatynda 1000-nan astam turǵynǵa kómek kórsetildi.

Óńir basshysy Berdibek Saparbaev Aqtóbe oblysynda 1 qarashadan bastap, 200-den astam kásipkerdiń qoldaýymen azyq-túlik jáne taýarlardyń, jeke medıtsınalyq jáne sporttyq-saýyqtyrý ortalyqtaryndaǵy baǵalardy ósirmeý týraly moratorıı bastalǵanyn aıtyp ótti.

- Bıyl el Táýelsizdigine shırek ǵasyr tolmaq. Bul merekege árbir qazaqstandyq óz úlesin qosýy kerek. Memleket basshysy Nursultan Nazarbaevtyń, jalpy Qazaqstan halqynyń armany - Táýelsizdigimizdiń máńgilik bolýy. Ol úshin árbir azamat aınalasyndaǵy kómekke muqtaj jandarǵa qol ushyn sozýy qajet.

Osy rette metsenattar esebinen qaıyrymdylyq jobalary júzege asyrylýda. Jyl bastalǵaly oblysymyzda 352 qaıyrymdylyq aktsııasy ótkizilip, 14 myń adamǵa jalpy somasy 100 mıllıon teńgege qoldaý kórsetildi, - dep, aktsııaǵa demeýshilik tanytqan kásiporyn basshylaryna rızashylyǵyn bildirdi.

Shara barysynda «SNPS-Aqtóbemunaıgaz» AQ bas dırektory Van Tszıýnjen 9 az qamtylǵan otbasyǵa, birinshi jáne ekinshi toptaǵy múgedek balalarǵa, sondaı-aq jalǵyzbasty analarǵa materıaldyq kómek kórsetti. Olardyń qatarynda Samat Qabylov, Tursyn Bakredınova, Shárıpa Tursynova, Gúlden Álıeva syndy  jáne basqa da qarjylaı kómek alǵan jandar bar.

«QazaqOıl-Aqtóbe» JShS 8 kópbalaly otbasyna jáne birinshi, ekinshi toptaǵy múgedekterge kıim-keshek satyp alýǵa kómektesti. «Saǵyz-Petrolıým» JShS Alǵa jáne Baıǵanın aýdandaryndaǵy 9 shańyraqqa kógildir otyn tartýǵa qarjylaı sertıfıkat usyndy. Solardyń biri Baıǵanın aýdanynyń 53 jastaǵy turǵyny Kúlásh Jubasheva.

- Aýdanǵa osydan úsh jyl buryn kógildir otyn kirdi degende qýanǵan edik. Biraq qarajattyń joqtyǵynan úıge jylý kirgizý qıynǵa soqty. Ózim jalǵyzbasty anamyn. Tórt balam bar. Búginde kómirdiń tonnasyn 12 myń teńgege satyp alamyz. Endi Táýelsizdiktiń 25 jyldyǵy qarsańyndaǵy aktsııa arqyly qoldaý kórsetip, 300 myń teńgelik sertıfıkat usynǵan kásiporynǵa alǵysym sheksiz, - deıdi ol.

«Voshod-Orıel» JShS Hromtaý aýdanynyń Sarysaı, Nıkeltaý, Aqjar aýyldarynyń 7 otbasyn gaz jáne jylý kózderimen qamtýǵa yqpal etti.

Óńir basshysynyń bastamasymen «Shyǵys» jáne «Altaı» bazarlarynda eki qaıyrymdylyq dúkenin ashqan  «Іsker áıelder qaýymdastyǵy» Aqtóbe fılıalynyń ókilderi 6 aı ishinde 4500 az qamtylǵan otbasynyń balalaryn kúzgi jáne qysqy kıimmen qamtydy. Bul aktsııaǵa barlyq  kásipker áıelder qatysqan.

Al jeke jáne medıtsınalyq mekemeler 200 aqtóbelik turǵynǵa stomatologııalyq kómek kórsetti.

Beıbitshilik jáne kelisim keńesiniń Aqtóbe fılıalynyń tóraǵasy, ardager Keldibaı Espaǵambetov az qamtylǵan otbasylarǵa  óz menshiginen 10 qoı, jylqy jáne sıyr bóletinin málimdep, aqtóbelikterdi qamqorlyqqa bólegen aktsııaǵa qoldaý tanytty.

Bul kún Alǵa balalar úıiniń túlegi, qazirgi Jasóspirimder úıiniń tárbıelenýshisi Baqytgúl Qalıeva úshin de erekshe kún boldy. Sebebi ol jeke páteriniń kiltine ıe boldy.

- 2012 jyly mektep bitirip, kolledjge oqýǵa tústim. Qazirgi tańda oblystyq mamandandyrylǵan aýdanaralyq sotynda qyzmet atqaramyn. Ózimnen keıingi sińlim stýdent. Páterge dep ápkem ekeýmiz aqsha jınaǵan boatynbyz. Oblys ákiminiń qoldaýymen esepshotymyzǵa 1,5 mıllıon teńge túsip, baspanaly boldyq, óte qýanyshtymyz, - deıdi Baqytgúl.

Sonymen qatar, memlekettik qyzmetkerlerdiń qarjysy esebinen  taǵy eki tárbıelenýshige páter kilti tabystaldy.

Jalpy alǵanda aktsııa barysynda 223 jetim balanyń «Turǵynúı qurylysjınaqbanktegi» esepshoty 6,1 mln teńgege tolyqty.

Budan ózge, Aqtóbe oblysy ákimdiginiń qyzmetkerleri men depýtattary «Paryz» qoryna 1 mln teńge aýdardy.

Sondaı-aq bul ıgi shara oblystyń aýdandarynda da jalǵasyn tapty. Óńirdegi 12 aýdannyń kásipkerleri tikeleı efırde aktsııaǵa qosyldy. Buǵan deıin olar aýyldyq jerlerde turatyn kópbalaly az qamtylǵan otbasylardyń turmystyq jaǵdaıyn zerttep, aktsııa barysynda olarǵa turmystyq tehnıkalar,  sonymen qatar qysqy kıim-keshekter men aıaqkıimder tabystady.

Oblys ákimi Qazaqstan halqynyń qoǵamdyq kelisimi men jalpy ulttyq birligin nyǵaıtýda osyndaı aktsııanyń  mańyzdylyǵyn jáne ári qaraı jalǵasyn tabatynyn atap ótti.