«Aqtóbe» men «Jaıyq» komandalary Qazaqstan kýbogyna talasady

AQTÓBE. KAZINFORM – Aqtóbe qalasynda voleıboldan erler komandalary arasynda Qazaqstan kýbogynda jartylaı fınaldyq kezdesýler aıaqtaldy.

Birinshi jartylaı fınaldyq matchta Oraldyń «Jaıyǵy» men «Jetisý» (Taldyqorǵan) komandalary alańǵa shyqty.

Ótken maýsymda el chempıonatynda besinshi orynǵa turaqtap, júldeli oryndardan tys qalǵan «Jaıyqty» (bas bapkeri Vıktor Kozık) kúsheıtý úshin Oral voleıbolynyń túlekteri, komanda kapıtany Vıtalıı Vorıvodın, Vladımır Prokofevtiń qataryna bıyl Vıtalıı Erdshteın, Borıs Kempa, Mıhaıl Morov sııaqty tájirıbeli oıynshylar qosyldy. 

Bul joly birinshi partııada «Jaıyq» 25:21 esebimen basymdylyq tanytsa, ekinshisinde Marat Adryshevtiń shákirtteri tarazy basyn teńestirdi – 25:15. Degenmen budan keıin batysqazaqstandyqtar oıyn tizginin ýysynan shyǵarǵan joq – 25:14, 25:21. Jalpy esep – 3:1, «Jaıyqtyń» paıdasynda. 

Fınalǵa ekinshi joldamany «Aqtóbe» (bas bapkeri Sergeı Trıkoz) men ótken jylǵy kýbok jáne sýperkýbok ıegeri, Sergeı Grıbov jattyqtyratyn «Pavlodar» komandalary sarapqa saldy. 

Match barysynda jankúıerleri qyzý qoldaǵan aqtóbelikter birinshi partııany óz esebine jazdy – 25:18. Ekinshisinde pavlodarlyqtar ese qaıyrdy – 25:21. Degenmen alań ıeleri óz degenine jetti – 25:23, 25:16. Jalpy esep – 3:1. Komanda kapıtany Aıbat Netalın, Damır Ákimov, 42 jastaǵy ýkraınalyq baılanystyrýshy Roman Handrolın, Nadırhan Qadyrhanov sııaqty tisqaqqan voleıbolshylar «Aqtóbeni» órge súıreı bildi. 

Osylaısha, 13 qazan kúni fınalda aqtóbelikter men oraldyqtar el kýbogy úshin talasady. «Pavlodar» men «Jetisý»» qola júlde úshin alańǵa shyǵady. 

Eske sala keteıik, budan buryn voleıboldan Qazaqstan kýbogynda jartylaı fınalǵa shyqqan komandalar belgili bolǵanyn jazǵan edik.