Aqtóbe men Orynbor oblystary birneshe memorandýmǵa qol qoıdy
AQTÓBE. QazAqparat - Aqtóbe men Orynbor oblystaryndaǵy mektep oqýshylary jazǵy lagerde tegin demalady. Kásipkerler palatasy kórshi oblystaǵy áriptesterimen birlese jumys isteýge kelisti, dep habarlaıdy QazAqparat tilshisi.
Aqtóbedegi Orynbor kúnderi aıasynda úsh memorandýmǵa qol qoıyldy. Aldaǵy ýaqytta Orynbordyń 120 oqýshysy «Ásem» lagerinde tynyǵyp, Aqtóbeniń 120 balasy «Solnechnaıa storona» lagerinde tegin demalady. Al «Atameken» kásipkerler palatasy reseılik áriptesterimen ınvestıtsııa, memlekettik qoldaý, tıimdi baǵdarlamalardy kásipkerlerge túsindirip, jobalarmen bólisý jumysyn qolǵa aldy. Al «Tıýlgan» mashına jasaý zaýyty men Qazaqstandaǵy munaı jabdyqtary zaýyty óndiriske qajetti ónimdi bir-birinen satyp alatyn boldy. Kezdesý kezinde óńir basshysy Berdibek Saparbaev Orynbordyń qyzyqty jobalarynan tájirıbe jınaýǵa bolatynyn jetkizdi.
«Ókinishke qaraı, jasyl ekonomıka jaǵynan artta qalyp kelemiz. Orynbor kún energeıasynan 200 Mvt qýat salsa, bul óte jaqsy joba. Qazaqstannyń da basty maqsaty -jasyl ekonomıkany damytý. EKSPO halyqaralyq kórmesi de osy taqyrypta ótti. Aqtóbede de jel, kún, sý qýaty bar. Orynbordan tájirıbe alýymyz tıis. Kásipkerlerge arnalǵan jedel járdem jobasy da unady. Bizde de aýdan, aýylǵa baryp, memlekettik baǵdarlamalardyń ońtaıly joldary túsindiriledi. Eger jedel járdem baǵytynda bolsa, kásipkerlerge kóp kómegi tıer edi. «Tálimger» jobasy da jaqsy. Bilimdi, tájirıbeli adamnyń bar múmkindigin paıdalanyp, jas mamannyń biliktiligin arttyrý mańyzdy ekenin esten shyǵarmaı, kádege asyrý kerek. Al memlekettik-jekeshelik seriktestik baǵytyna kelsek, Aqtóbe tek áleýmettik saladaǵy jobalardy iske asyryp jatyr. Al turǵyn úı-kommýnaldyq salasyna keler bolsa, birneshe aýylǵa gaz qubyryn tartamyz. Men túrǵyn úı-kommýnaldyq salasyndaǵy memlekettik-jekemenshik áriptestikti damytý jobasyn qaraýdy jón kóremin»,- dedi oblys ákimi Berdibek Saparbaev.
Aıta keteıik, Aqtóbe-Orynbor arasyndaǵy jol jóndelgen soń kólik qatynasy artty. Bıyl Aqtóbe-Orsk baǵytyndaǵy joldy jóndeý jumysy aıaqtalady. Al turǵyndar men jolaýshylardyń qatynasy úshin tıimdi Jırenqopadaǵy ótkizý beketi keler jyly ashylatyn boldy.
«Jyl saıyn Aqtóbe men Orynbor arasyndaǵy taýar aınalymy artyp keledi. Bul baǵa turaqtylyǵyn qamtamasyz etýge, básekelestikti damytýǵa septigin tıgizedi. Shaǵyn jáne orta bızneste tájirıbe almasa alamyz. Máselen, oblys ákiminiń grantyna «60/15» kásipkerler konkýrsyn ótkizdik. Reseıden alynǵan tájirıbe óte yńǵaıly»,- dedi oblystyq kásipkerler basqarmasynyń basshysy Anar Darjanova.
